വെർജീനിയ: വെർജീനിയ ഇന്ത്യൻ നഴ്സസ് അസോസിയേഷന്റെ (VINA) ആഭിമുഖ്യത്തിൽ ഈ വർഷത്തെ അന്താരാഷ്ട്ര നഴ്സസ് ദിനാഘോഷം പ്രൗഢഗംഭീരമായി നടത്തി. സംഘടനാംഗമായ സുധ അനുരൂപിന്റെ വസതിയിൽ വെച്ചായിരുന്നു ആഘോഷപരിപാടികൾ അരങ്ങേറിയത്.
​മിസ്. മേരി പെരേര പരമ്പരാഗത രീതിയിൽ നിലവിളക്ക് തെളിയിച്ചതോടെ ചടങ്ങുകൾക്ക് ഔപചാരികമായ ആരംഭം കുറിച്ചു. തുടർന്ന് നഴ്സിംഗ് സമൂഹത്തിന്റെ ആദർശങ്ങൾ പുതുക്കിക്കൊണ്ട് അവർ ഫ്ലോറൻസ് നൈറ്റിംഗേൽ പ്രതിജ്ഞ വാചകം ചൊല്ലി നൽകി.
​അസോസിയേഷന്റെ ആക്ടിംഗ് പ്രസിഡന്റ് ജീന ജോസഫ് ചടങ്ങിൽ സ്വാഗതം ആശംസിച്ചു. തുടർന്ന് ഡോ. അശ്വതി വർഗീസ് മുഖ്യപ്രഭാഷണം നടത്തുകയും നഴ്സസ് ദിന സന്ദേശം കൈമാറുകയും ചെയ്തു.

മികച്ച നേട്ടങ്ങൾ കൈവരിച്ചവർക്ക് ആദരം
നഴ്സിംഗ് രംഗത്ത് ഉപരിപഠനത്തിലൂടെ മികച്ച വിദ്യാഭ്യാസ നേട്ടങ്ങൾ കൈവരിച്ച സംഘടനാംഗങ്ങളെ ചടങ്ങിൽ വെച്ച് പ്രത്യേകമായി ആദരിച്ചു. ഡോ. സ്മിത നായർ (DNP), ലിജിൻ പാപ്പച്ചൻ (NP), സുധ അനുരൂപ് (BSN), ശിവാനി ഭണ്ഡാരി (BSN), സ്വപ്നാമ്മ സക്കറിയ (MSN) എന്നിവരാണ് സംഘടനയുടെ ആദരവിന് അർഹരായത്.
​നഴ്സിംഗ് മേഖലയുമായി ബന്ധപ്പെടുത്തി ഒരുക്കിയ വിനോദ പരിപാടികളും ഗെയിമുകളും ആഘോഷങ്ങൾക്ക് മാറ്റുകൂട്ടി. തുടർന്ന് നടന്ന സ്നേഹവിരുന്നോടെയാണ് പരിപാടികൾ സമാപിച്ചത്. അസോസിയേഷൻ അംഗം ഷീജ അഗസ്റ്റിൻ ചടങ്ങിന് നന്ദി രേഖപ്പെടുത്തി..