കേരള നിയമസഭാ തിരഞ്ഞെടുപ്പിൽ ധർമ്മടത്തുനിന്നും വിജയിച്ചു മുൻ മുഖ്യമന്ത്രി പിണറായി വിജയൻ. വിജയിച്ചു എന്ന് പറയുമെങ്കിലും അതൊരു തിളക്കമാർന്ന വിജയമായിരുന്നില്ല. മുക്കിയും മൂളിയും ഇത്തവണ നിയമസഭയിൽ എത്തി എന്ന് മാത്രം പറയാം. ആദ്യത്തെ ആറ് റൗണ്ടുകൾ പിന്നിടുമ്പോൾ പിണറായി വിജയനെതിരെ കരുത്ത് കാട്ടിയിരുന്നു ബിപി അബ്ദുൽ റഷീദ്. മണിക്കൂറുകൾ നീണ്ട അനശ്വരത്വത്തിൻ ഒടുവിലാണ് മുഖ്യമന്ത്രി വീണ്ടും ലീഡ് തിരിച്ചുപിടിച്ചത്. ഒടുവിൽ ഇപ്പോൾ 19247 വോട്ടുകൾ നേടിയാണ് പിണറായി വിജയൻ ധർമ്മടത്തുനിന്നും വിജയിച്ചത്. ആകെ നേടിയ വോട്ട് 85614 ആണ്.

2011ൽ രൂപീകൃതമായത് മുതൽ ഇടതുപക്ഷത്തെ ചേർത്ത് നിർത്തിയ മണ്ഡലമാണ് ധർമ്മടം. എന്നാൽ ഇത്തവണ പരമ്പരാഗതമായ ഇടത് വോട്ടുകൾ പോലും മുൻ മുഖ്യമന്ത്രിക്ക് നേടാനായില്ല എന്നത് എൽഡിഎഫ് എന്ന പ്രസ്ഥാനത്തെ സംബന്ധിച്ച് വലിയ ഒരു ആശങ്കയായി മാറിയിരിക്കുകയാണ്. വ്യക്തമായ ഒരു ഭരണവിരുദ്ധ വികാരം തന്നെയാണ് ഇത്തവണ കേരള നിയമസഭാ തിരഞ്ഞെടുപ്പിൽ ജനങ്ങൾ എൽഡിഎഫിന് നൽകിയിരിക്കുന്നത്. 2016 ൽ 36905 വോട്ടിന്റെ ഭൂരിപക്ഷത്തിലാണ് പിണറായി വിജയൻ മണ്ഡലത്തിൽ നിന്നും വിജയിച്ചത്. രണ്ടാം തവണ അത് അര ലക്ഷത്തിന് മുകളിൽ ഉയർത്തി. എന്നാൽ മൂന്നാം തവണ എത്തിയപ്പോഴേക്കും അത് പതിനായിരത്തിലേക്ക് ചുരുങ്ങിയിരിക്കുന്നു. എൽഡിഎഫിന്റെ ചരിത്രത്തിൽ തന്നെ ഇത് ആദ്യമായി ആയിരിക്കാം ധർമ്മടത്ത് ഇത്രയും കുറഞ്ഞ ഭൂരിപക്ഷത്തിൽ ഒരു സ്ഥാനാർത്ഥി വിജയിക്കുന്നത്. കണ്ണൂർ ലോക്സഭാ മണ്ഡലത്തിന്റെ ഭാഗമാണ് ധർമ്മടം. ശബരിമല വിഷയം അടക്കമുള്ള വിവാദങ്ങളാണ് പാർട്ടിക്ക് മണ്ഡലത്തിൽ സ്വീകാര്യത നഷ്ടപ്പെടുത്തിയത് എന്നാണ് സൂചന.