കേരള ഹിന്ദു റിച്ച്മണ്ട് മെട്രോ ഏരിയ (KHRMA)യുടെ നേതൃത്വത്തിൽ മാർച്ച് 6-ന് റിച്ച്മണ്ട് പ്രദേശത്തെ മലയാളി ഹിന്ദു ഭക്തജനങ്ങൾ ഒത്തുചേർന്ന് ഭക്തിപൂർവ്വം പൊങ്കാല ആഘോഷിച്ചു. വിർജീനിയയിലെ ഹിന്ദു സെന്റർ (Hindu Center of Virginia) ക്ഷേത്ര പരിസരത്താണ് ചടങ്ങുകൾ നടന്നത്.

രാവിലെ 8:30-ന് അടുപ്പുവെട്ടോടെ ആരംഭിച്ച പൂജകൾ 11 മണിയോടെ സമാപിച്ചു. ശർക്കര പായസം, തെരളി, അപ്പം എന്നിവ പ്രസാദമായി ഭക്തിപൂർവ്വം പാകം ചെയ്തു. ഒൻപത് ദിവസത്തെ വ്രതശുദ്ധിയോടെ എത്തിയ വനിതാ ഭക്തർ ചടങ്ങിൽ ലളിതാ സഹസ്രനാമം ജപിച്ചതോടെ അന്തരീക്ഷം ഭക്തിസാന്ദ്രമായി. തുടർന്ന് പാകം ചെയ്ത നിവേദ്യങ്ങൾ പൂജാരി ദേവിക്ക് സമർപ്പിക്കുകയും, പ്രഭാതഭക്ഷണവും നിവേദ്യവും എല്ലാ ഭക്തർക്കും വിതരണം ചെയ്യുകയും ചെയ്തു.

വനിതാഭക്തർ ഒരുമിച്ച് പൊങ്കാല സമർപ്പിച്ചതും മറ്റു ഭക്തർ ഒരുക്കങ്ങളിലും ക്രമീകരണങ്ങളിലും ശുചീകരണത്തിലും സജീവമായി പങ്കെടുത്തതും സമൂഹ ഐക്യത്തിന്റെ മനോഹരമായ കാഴ്ചയായി. ചടങ്ങിന് തുടക്കം കുറിച്ചുകൊണ്ട് ക്ഷേത്രത്തിലെ പൂജാരി പ്രത്യേക പൂജകൾ നടത്തി.

കെ.എച്ച്.ആർ.എം.എ എക്സിക്യൂട്ടീവ് കമ്മിറ്റി അംഗങ്ങളായ രാഹുൽ രാജ്, ഡോ. ഹരി കൃഷ്ണൻ, സപ്ന മുരുകേശൻ എന്നിവർ സന്നദ്ധ പ്രവർത്തകരോടൊപ്പം ചേർന്ന് പരിപാടിയുടെ വിജയത്തിനായി അശ്രാന്തമായി പരിശ്രമിച്ചു. പൊങ്കാല സമർപ്പണ സമയത്ത് ലഭിച്ച മനോഹരമായ കാലാവസ്ഥ ആറ്റുകാൽ അമ്മയുടെ അനുഗ്രഹമായി ഭക്തർ ഏറ്റുവാങ്ങി. ഭക്തിയും ഐക്യവും സന്തോഷവും നിറഞ്ഞ ഹൃദയങ്ങളോടെയാണ് ചടങ്ങുകൾ സമാപിച്ചത്.