ചെന്നൈ: കരൂര്‍ ദുരന്തവുമായി ബന്ധപ്പെട്ട് ആദ്യമായി പ്രതികരിച്ച് നടനും ടിവികെ അധ്യക്ഷനുമായ വിജയ്. ദുരന്തത്തിന്റെ ഉത്തരവാദിത്തം തന്റെ മേൽ മാത്രം ആരോപിച്ചാൽ മതിയെന്നും, പാർട്ടി പ്രവർത്തകരെ വേട്ടയാടരുത് എന്നും വിജയ് ആവശ്യപ്പെട്ടു. സി എം സാർ (സ്റ്റാലിൻ) എന്ന് പറഞ്ഞു കൊണ്ടാണ് വീഡിയോയിൽ അദ്ദേഹം ഇക്കാര്യങ്ങൾ പറഞ്ഞത്.
ജനങ്ങൾക്ക് എല്ലാം അറിയാമെന്നും സത്യം പുറത്തുവരുമെന്നും പങ്കുവെച്ച വീഡിയോയിലൂടെ വ്യക്തമാക്കി. കരൂരിൽ മാത്രം ദുരന്തമുണ്ടായത് എങ്ങനെ എന്ന സംശയം ഉന്നയിച്ച് ഒരു ഗൂഢാലോചനയുടെ സൂചന നൽകാനും വീഡിയോ സന്ദേശത്തിൽ അദ്ദേഹം മടിച്ചില്ല. തന്റെ വേദന മനസിലാക്കി ഒപ്പം നിന്നവര്‍ക്ക് നന്ദി എന്നും വിജയ് വിഡിയോ സന്ദേശത്തില്‍ പറയുന്നു.
— TVK Vijay (@TVKVijayHQ) September 30, 2025
നികത്താനാവാത്ത ദുഃഖമാണ് തനിക്കിപ്പോൾ ഉള്ളതെന്ന് വിജയ്. ജീവിതത്തിൽ ഇത്രയും വേദനാജനകമായ ഒരനുഭവം ഉണ്ടായിട്ടേയില്ല. മനസ്സ് മുഴുവൻ വേദനയാണ്. വേദന മാത്രമാണെന്നും വികാരാധീനനായിക്കൊണ്ട് അദ്ദേഹം പറഞ്ഞു. തന്റെ വേദനയിൽ ഒപ്പം നിന്നവർക്ക് നന്ദി പറഞ്ഞ വിജയ്, തന്നെ കാണാൻ ജനങ്ങൾ വരുന്നത് സ്നേഹം കൊണ്ടാണെന്നും ആ സ്നേഹത്തോട് താൻ കടപ്പെട്ടിരിക്കുന്നു എന്നും കൂട്ടിച്ചേർത്തു.
കൂടുതൽ സുരക്ഷ ഉറപ്പാക്കാൻ താൻ ആവശ്യപ്പെട്ടിരുന്നു എന്നും, എന്നാൽ നടക്കാൻ പാടില്ലാത്തത് നടന്നു എന്നും വിജയ്. അപകടം നടന്നയുടൻ ആശുപത്രിയിൽ പോകാതിരുന്നതിന്റെ കാരണം താൻ പോയാൽ ആശുപത്രിയിൽ പോയാൽ കൂടുതൽ പ്രശ്‌നമുണ്ടാകുമായിരുന്നു എന്ന് ഉറപ്പുള്ളതുകൊണ്ടാണെന്നും പറഞ്ഞു. എല്ലാ സത്യവും പുറത്ത് വരുമെന്നും റ്റവരെ നഷ്ടപ്പെടുന്നവരുടെ വേദനയ്ക്ക് ഒന്നിനും പകരമാകില്ല എന്നും കൂട്ടിച്ചേർത്തു.