സി.പി.എം. സ്ത്രീകളെ വേട്ടയാടുന്ന പാർട്ടിയായി മാറിയെന്ന് പ്രതിപക്ഷ നേതാവ് വി.ഡി. സതീശൻ ആരോപിച്ചു. ആര്യനാട്ടിൽ പഞ്ചായത്ത് അംഗം ആത്മഹത്യ ചെയ്ത സംഭവവുമായി ബന്ധപ്പെട്ട് മാധ്യമങ്ങളോട് സംസാരിക്കുകയായിരുന്നു അദ്ദേഹം. പൊതുയോഗം നടത്തി അധിക്ഷേപിച്ചതിൽ മനംനൊന്താണ് ആര്യനാട്ടിലെ പഞ്ചായത്ത് അംഗം ആത്മഹത്യ ചെയ്തതെന്നും, ഈ സംഭവത്തിൽ ഉത്തരവാദികളായവർക്കെതിരെ ആത്മഹത്യാ പ്രേരണയ്ക്ക് കേസെടുക്കണമെന്നും അദ്ദേഹം ആവശ്യപ്പെട്ടു.
മരണം സംഭവിച്ച ശേഷം പഞ്ചായത്ത് അംഗത്തിന്റെ ഭർത്താവും മകളും പോലീസ് സ്റ്റേഷനിൽ പരാതി നൽകാൻ പോയെങ്കിലും മൊഴിയെടുക്കാൻ പോലും പോലീസ് തയ്യാറായില്ലെന്ന് സതീശൻ ആരോപിച്ചു. സി.പി.എം. നടത്തുന്ന ഈ വേട്ടയാടൽ അവസാനിപ്പിക്കണമെന്നും, പോലീസ് സ്റ്റേഷനിൽ പോലും നീതി ലഭിക്കുന്നില്ലെന്നും അദ്ദേഹം കൂട്ടിച്ചേർത്തു.
ജി.എസ്.ടി. വിഷയത്തിൽ രാഷ്ട്രീയ നേതൃത്വത്തിന്റെ അറിവോടെ അഴിമതി നടക്കുന്നുണ്ടെന്ന് ആരോപിച്ച സതീശൻ, സി.പി.എമ്മുകാർ അധികം കളിക്കരുതെന്നും മുന്നറിയിപ്പ് നൽകി. "ഞെട്ടിക്കുന്ന ഒരു വാർത്ത അധികം വൈകാതെ പുറത്തുവരും," എന്നും അദ്ദേഹം പറഞ്ഞു. ഇത് ഒരു ഭീഷണിയാണോ എന്ന മാധ്യമപ്രവർത്തകരുടെ ചോദ്യത്തിന്, "ആണ്" എന്ന് അദ്ദേഹം മറുപടി നൽകി. തിരഞ്ഞെടുപ്പിന് മുൻപ് ഈ വിവരം വെളിപ്പെടുത്തുമോ എന്ന ചോദ്യത്തിന്, "അത്ര ദിവസം പോകില്ല," എന്നും അദ്ദേഹം കൂട്ടിച്ചേർത്തു.
ബി.ജെ.പിക്കെതിരെയും വി.ഡി. സതീശൻ വിമർശനം ഉന്നയിച്ചു. "എന്റെ വീട്ടിലേക്ക് വിത്തുകാളയുമായി വന്ന ബി.ജെ.പിക്കാർ അതിനെ കെട്ടിയിടണം, അതിന്റെ ആവശ്യം ബി.ജെ.പിക്ക് ഉടൻ വരും," എന്ന് അദ്ദേഹം പരിഹസിച്ചു.