തിരുവനന്തപുരം: യു.ഡി.എഫ് സർക്കാരിന്റെ അഭിമാന പദ്ധതിയായ 'ഇന്ദിരാ ഗ്യാരന്റി'യിലെ ഒന്നാമത്തെ വാഗ്ദാനം യാഥാർത്ഥ്യത്തിലേക്കെത്താനുള്ള ആദ്യചുവട് വയ്ക്കുന്നു. കെ.എസ്.ആർ.ടി.സി ബസ്സുകളിൽ സ്ത്രീകൾക്ക് സൗജന്യ യാത്ര ഉറപ്പാക്കുന്ന പദ്ധതിയുടെ പ്രാഥമിക ഘട്ടമെന്ന നിലയിൽ ജൻഡർ ടിക്കറ്റിംഗ് സംവിധാനം നാളെ മുതൽ ആരംഭിക്കും. ഇത് സംബന്ധിച്ച് ഉത്തരവ് പുറപ്പെടുവിച്ച് കെഎസ്ആർടിസി. കെഎസ്ആർടിസിയിൽ ടിക്കറ്റ് വിതരണം ചെയ്യുമ്പോൾ യാത്രക്കാരെ പുരുഷൻ/സ്ത്രീ എന്ന് രേഖപ്പെടുത്തുന്നതിനുള്ള സൗകര്യം നാളെ മുതൽ പ്രാബല്യത്തിൽ വരുത്തുമെന്ന് കെഎസ്ആര്‍ടിസി ഡെപ്യൂട്ടി ജനറൽ മാനേജർ നിഷാന്ത് എസ് ഉത്തരവിറക്കി.സ്ത്രീ യാത്രക്കാരുടെ എണ്ണം അറിയുക ആണ് നടപടിയിലൂടെ ലക്ഷ്യം വെയ്ക്കുന്നത്.

'ഇടിഎം ഉപകരണങ്ങൾ വഴി ടിക്കറ്റ് വിതരണം ചെയ്യുമ്പോൾ യാത്രക്കാരെ പുരുഷൻ/സ്ത്രീ എന്ന് രേഖപ്പെടുത്തുന്നതിനുള്ള സൗകര്യം ശനിയാഴ്ച മുതൽ പ്രാബല്യത്തിൽ വരുമെന്നും റിപ്പോർട്ട്. ഇതുപ്രകാരം, കണ്ടക്ടർമാർ ETM ഉപകരണങ്ങൾ ഉപയോഗിച്ച് വിതരണം ചെയ്യുന്ന ടിക്കറ്റില്‍ സ്ത്രീക്കാണോ പുരുഷനാണോ നല്‍കുന്നതെന്ന് രേഖപ്പെടുത്തണം. ഇക്കാര്യം കൃത്യമായി പാലിക്കുന്നതിന് എല്ലാ ഡിപ്പോകൾക്കും ആവശ്യമായ നിർദ്ദേശങ്ങൾ നൽകേണ്ടതാണെന്നും ഉത്തരവില്‍ വ്യക്തമാക്കുന്നു