ചെന്നൈ: കരൂരിലെ ദുരന്തത്തിന് പിന്നാലെ ഗുരുതരമായ ആരോപണങ്ങളാണ് വിജയ്ക്കും ടിവികെയ്ക്കും എതിരെ എത്തുന്നത്. കൂടുതൽ ആളുകളെത്താൻ വേണ്ടി പരിപാടി മനഃപൂർവം വൈകിച്ചു എന്നാണ് പ്രധാന ആരോപണം. വിജയ്‌ക്കെതിരെ പോലീസ് രജിസ്റ്റർ ചെയ്ത എഫ്‌ഐആറിൽ ആണ് ഗുരുതര പരാമർശമുള്ളത്. നാമക്കലിൽ എട്ടേമുക്കാലിന് എത്തുമെന്നാണ് ആദ്യം അറിയിച്ചിരുന്നത്. എന്നാൽ, നിശ്ചയിച്ച സമയത്തേക്കാൾ മണിക്കൂറുകൾ വൈകിയാണ് വിജയ് പരിപാടിയിൽ എത്തിച്ചേർന്നത് എന്നും എഫ്‌ഐആറിൽ പറയുന്നു. ഈ കാലതാമസം കൂടുതൽ ആളുകൾ പരിപാടി നടക്കുന്ന സ്ഥലത്തേക്ക് എത്തിച്ചേരാൻ കാരണമായിയെന്നും റിപ്പോർട്ട്.
കൂടാതെ, റാലി നടന്ന സ്ഥലത്തുണ്ടായ വൈദ്യുതിതടസത്തെച്ചൊല്ലിയുള്ള വിവാദങ്ങളും മുറുകുന്നു. റാലി നടന്ന പ്രദേശത്ത് സംഭവദിവസം താത്കാലികമായി വൈദ്യുതി വിതരണം നിർത്തിവെക്കണമെന്ന് ആവശ്യപ്പെട്ട് തമിഴക വെട്രി കഴകം (ടിവികെ) നൽകിയ കത്ത് പുറത്തുവന്നതോടെയാണ് ഇതുസംബന്ധിച്ച വിവാദങ്ങൾ ശക്തമായത്. പൊതുസുരക്ഷ കണക്കിലെടുത്ത് മേഖലയിലെ വൈദ്യുതി വിതരണം താത്കാലികമായി നിർത്തണമെന്ന് ആവശ്യപ്പെട്ടാണ് ടിവികെ ഭാരവാഹികൾ വൈദ്യുതിബോർഡിന് കത്ത് നൽകിയതെന്ന് ദേശീയ മാധ്യമങ്ങൾ റിപ്പോർട്ട് ചെയ്തു.
സെപ്റ്റംബർ 27-ന് രാത്രി കരൂരിലെ വേലുച്ചാമിപുറത്ത് വൻ ജനക്കൂട്ടം എത്തുമെന്ന് പ്രതീക്ഷിക്കുന്നതിനാൽ, ജനങ്ങളുടെ സുരക്ഷ മുൻനിർത്തി വൈദ്യുതി വിതരണം നിർത്തിവെക്കണമെന്നായിരുന്നു ടിവികെ നേതാക്കളുടെ കത്തിലെ ആവശ്യം. ടിവികെയിൽ നിന്ന് ഇത്തരമൊരു കത്ത് ലഭിച്ചതായി തമിഴ്‌നാട് വൈദ്യുതിബോർഡ് അധികൃതരും സ്ഥിരീകരിച്ചു. അതേസമയം, ടിവികെയുടെ ഈ ആവശ്യം വൈദ്യുതിബോർഡ് നിരസിച്ചതായി ചീഫ് എൻജിനീയർ രാജലക്ഷ്മി പ്രതികരിച്ചു.
എന്നാൽ റാലി നടന്ന വേദിയിൽ വൈദ്യുതി തടസ്സപ്പെട്ടിട്ടില്ല എന്നായിരുന്നു സംഭവത്തെക്കുറിച്ച് തമിഴ്‌നാട് സർക്കാരിന്റെ പ്രതികരണം. പരിപാടിക്കിടെ പവർകട്ട് ഉണ്ടായിട്ടില്ലെന്നും, എന്നാൽ, ടിവികെ പാർട്ടി വൈദ്യുതി വിതരണം നിർത്തിവെക്കാൻ അഭ്യർഥിച്ചിരുന്നുവെന്നും സംസ്ഥാന സർക്കാരിന്റെ ഫാക്‌ട്‌ചെക്ക് വിഭാഗം അറിയിച്ചു. എന്നാൽ ടിവികെയുടെ ആവശ്യം തള്ളിയതായും വൈദ്യുതി വിതരണം തടസ്സപ്പെട്ടിട്ടില്ലെന്നും അധികൃതർ വ്യക്തമാക്കി. ടിവികെ പരിപാടിക്കായി കൊണ്ടുവന്ന ഒരു ജനറേറ്ററിന് തകരാർ സംഭവിച്ചതാണ് ചില ഭാഗത്തെ ലൈറ്റുകൾ അണയാൻ കാരണമെന്നും സർക്കാർ വൃത്തങ്ങൾ പറഞ്ഞു. തമിഴ്‌നാട് എഡിജിപിയും ജില്ലാ കളക്ടറും സമാനമായ വിശദീകരണമാണ് പവർകട്ടിനെ സംബന്ധിച്ച് നൽകിയത്.