തമിഴ്‌നാട്ടിലെ കരൂർ ജില്ലയിൽ തമിഴക വെട്രി കഴകം (ടി.വി.കെ.) പ്രസിഡന്റ് വിജയ്‌യെ കാണാൻ തടിച്ചുകൂടിയ ജനക്കൂട്ടത്തിലെ തിക്കിലും തിരക്കിലും പെട്ട് മരിച്ചവരുടെ എണ്ണം 30 കടന്നു. ഇതുവരെ 32 പേർ മരിച്ചതായി കരൂർ മെഡിക്കൽ സൂപ്രണ്ട് സ്ഥിരീകരിച്ചു. വിജയ്‌യുടെ സംസ്ഥാന പര്യടനത്തിന്റെ ഭാഗമായുള്ള റാലിയിൽ പങ്കെടുക്കാനെത്തിയവരാണ് തിക്കിലും തിരക്കിലുംപ്പെട്ടത്. മരിച്ചവരിൽ 3 കുട്ടികളും 6 സ്ത്രീകളും ഉൾപ്പെടുന്നു. നിലവിൽ 10 പേർ അതീവ ഗുരുതരാവസ്ഥയിലാണ്. സംഭവത്തിൽ മുഖ്യമന്ത്രി എം.കെ. സ്റ്റാലിൻ ആശങ്ക രേഖപ്പെടുത്തുകയും സ്ഥിതിഗതികൾ നേരിട്ട് വിലയിരുത്തുകയും ചെയ്തു. മരണസംഖ്യ ഇനിയും ഉയരാൻ സാധ്യതയുണ്ടെന്നാണ് പുറത്തുവരുന്ന വിവരം.

അതേസമയം അപകടത്തെ തുടർന്ന് വിജയ് പ്രസംഗം പൂർത്തിയാക്കാതെ മടങ്ങി. സ്ഥിതിഗതികൾ വിലയിരുത്തുന്നതിനായി മുഖ്യമന്ത്രി എം.കെ. സ്റ്റാലിൻ ഉടൻ നടപടിയെടുത്തു. അദ്ദേഹം സെന്തിൽ ബാലാജിയോട് കരൂർ ആശുപത്രിയിലെത്താൻ നിർദേശിച്ചു. കൂടാതെ, ആരോഗ്യ മന്ത്രിയും വിദ്യാഭ്യാസ മന്ത്രിയും ക്രമസമാധാന ചുമതലയുള്ള എ.ഡി.ജി.പി.യും ഉടൻ കരൂരിലേക്ക് തിരിക്കും. കരൂർ ജില്ലാ കളക്ടറോട് സംഭവസ്ഥലത്തെത്തി സ്ഥിതി വിലയിരുത്താനും മുഖ്യമന്ത്രി ആവശ്യപ്പെട്ടിട്ടുണ്ട്.

തിക്കിലും തിരക്കിലും കുഴഞ്ഞുവീണ നിരവധി പേരെ കരൂരിലെ വിവിധ ആശുപത്രികളിലായി ചികിത്സയ്ക്ക് എത്തിക്കുന്നുണ്ട്. അപകടം അറിഞ്ഞതിനെ തുടർന്ന് പ്രസംഗത്തിനിടെ വിജയ്, ആംബുലൻസ് വിളിക്കാൻ ടി.വി.കെ. നേതാക്കളോട് ആവശ്യപ്പെട്ടിരുന്നു. ജനത്തിരക്ക് നിയന്ത്രണാതീതമായതോടെയാണ് അദ്ദേഹം പ്രസംഗം അവസാനിപ്പിച്ചത്. ഇതിനിടെ ഒരു കുട്ടിയെ കാണാതായതായും വിവരമുണ്ട്.