ദാദാസാഹേബ് ഫാൽക്കെ പുരസ്‌കാരം ലഭിച്ച നടൻ മോഹൻലാലിന് സർക്കാർ നൽകിയ ആദരവിനെ വിമർശിച്ച് കോൺഗ്രസ് സംഘടനാ ജനറൽ സെക്രട്ടറി കെ.സി. വേണുഗോപാൽ. പരിപാടിക്ക് രാഷ്ട്രീയലക്ഷ്യം തോന്നിപ്പിക്കുന്ന തരത്തിലായിരുന്നു അതിന്റെ അവതരണമെന്ന് കെ.സി. വേണുഗോപാൽ വിമർശിച്ചു. മോഹൻലാലിനെ ആദരിച്ചതിൽ തെറ്റില്ലെന്നും അതിൽ എതിർപ്പില്ലെന്നും അദ്ദേഹം വ്യക്തമാക്കി.
എന്നാൽ, ഇത് ജനങ്ങളുടെ വെറുപ്പിനെ മറികടക്കാനുള്ള തന്ത്രമാണെന്നും അദ്ദേഹം കുറ്റപ്പെടുത്തി. മോഹൻലാലിനുള്ള ആദരമായതിനാൽ ഈ വിഷയം വിവാദമാക്കാൻ താൽപര്യമില്ലെന്നും അദ്ദേഹം കൂട്ടിച്ചേർത്തു. "ഫുട്ബോളും ഇതുപോലെയാക്കാനാണ് ശ്രമം" എന്നും അദ്ദേഹം അഭിപ്രായപ്പെട്ടു.അതേസമയം മോഹൻലാലിനെ ആദരിക്കുന്ന സംസ്ഥാന സർക്കാരിന്റെ ചടങ്ങിന് നൽകിയ 'മലയാളം വാനോളം ലാൽസലാം' എന്ന പേരിനെതിരെ അഭിനേതാക്കളുടെ സംഘടനയായ 'അമ്മ'യുടെ വൈസ് പ്രസിഡന്റ് ജയൻ ചേർത്തലയും വിമർശനവുമായി രംഗത്തെത്തിയിരുന്നു.
പേരിന് പിന്നിൽ 'പാർട്ടി തത്വങ്ങളുമായി ചേർത്തുകൊണ്ടുപോകാമെന്ന അതിബുദ്ധി'യാണുള്ളതെന്ന് അദ്ദേഹം കുറ്റപ്പെടുത്തി. 2014-ൽ കേന്ദ്രത്തിൽ ബിജെപി സർക്കാർ അധികാരത്തിൽ വന്നതോടെയാണ് രാജ്യത്ത് സാംസ്‌കാരിക കാഴ്ചപ്പാടുകൾക്ക് മാറ്റംവന്നതെന്നും അദ്ദേഹം ആരോപിച്ചു. ആലപ്പുഴയിൽ കോൺഗ്രസിന്റെ സാംസ്‌കാരിക സംഘടനയായ സംസ്‌കാര സമിതിതിയുടെ പരിപാടിയിൽ സംസാരിക്കുകയായിരുന്നു ജയൻ ചേർത്തല.