ചെന്നൈ: തമിഴക വെട്രിക് കഴകം (ടിവികെ) അധ്യക്ഷൻ വിജയ്‌യുടെ തിരഞ്ഞെടുപ്പ് പര്യടനം നാളെ ആരംഭിക്കും. തിരുച്ചിറപ്പള്ളി, പെരമ്പലൂർ, അരിയെല്ലൂർ എന്നീ മൂന്ന് ജില്ലകളിലാണ് ആദ്യഘട്ട പര്യടനം നടക്കുക. വിജയ്‌യുടെ റാലിക്ക് കർശന ഉപാധികളോടെയാണ് പോലീസ് അനുമതി നൽകിയിരിക്കുന്നത്.

പാർട്ടിയെ ശക്തിപ്പെടുത്തുക, 'പാർട്ട് ടൈം രാഷ്ട്രീയക്കാരൻ' എന്ന വിമർശനം മറികടക്കുക, ഒപ്പം എഐഎഡിഎംകെയിലെയും എൻഡിഎയിലെയും ആഭ്യന്തര തർക്കങ്ങൾ മുതലെടുത്ത് രാഷ്ട്രീയ നേട്ടം കൈവരിക്കുക തുടങ്ങിയ ലക്ഷ്യങ്ങളാണ് വിജയ്‌യുടെ ഈ നീക്കത്തിന് പിന്നിലുള്ളത്.

റാലിയിൽ പങ്കെടുക്കുന്നവർ രാവിലെ 9.30-ന് മുമ്പ് പ്രസംഗവേദിക്കടുത്ത് എത്തണം.വിജയ് റോഡ് ഷോ നടത്താൻ പാടില്ല.വിജയ്‌യുടെ വാഹനത്തിനൊപ്പം ആറ് വാഹനങ്ങൾ മാത്രമേ പാടുള്ളൂ.രാവിലെ 10.35-ന് ആരംഭിക്കുന്ന പ്രസംഗം 11 മണിക്ക് അവസാനിപ്പിക്കണം.ഈ നിബന്ധനകൾ പാലിച്ചുകൊണ്ടാണ് പര്യടനം നടക്കേണ്ടതെന്ന് പൊലീസ് അറിയിച്ചു. തിരുച്ചിറപ്പള്ളിക്ക് ശേഷം പെരമ്പലൂർ, അരിയെല്ലൂർ ജില്ലകളിലും വിജയ് സന്ദർശനം നടത്തും.

ശനിയാഴ്ചകളിൽ മാത്രമാണ് പര്യടനം നടക്കുന്നത്. ബിജെപി മുൻ അധ്യക്ഷൻ കെ. അണ്ണാമലൈ ഉൾപ്പെടെയുള്ളവർ ഇതിനെ കളിയാക്കിയിരുന്നു. ആരാധക കൂട്ടത്തിനപ്പുറം ജനങ്ങളിലേക്ക് എത്താൻ ഈ സംസ്ഥാന പര്യടനം സഹായിക്കുമെന്നാണ് വിജയ്‌യും ടിവികെയും പ്രതീക്ഷിക്കുന്നത്.