ഒരു സാഹചര്യത്തിലും ഇറാനെ ആണവായുധങ്ങൾ സ്വന്തമാക്കാൻ അനുവദിക്കില്ലെന്ന് യുഎസ് പ്രസിഡന്റ് ഡൊണാൾഡ് ട്രംപ്. കാരണം ഇത് മുഴുവൻ ലോകത്തിന്റെയും സുരക്ഷയ്ക്ക് ഗുരുതരമായ ഭീഷണിയാണ്. അതുകൊണ്ടാണ് ഇറാനെതിരെ സംഘർഷത്തിൽ ഏർപ്പെടാൻ അമേരിക്ക നിർബന്ധിതരായതെന്നും വ്യക്തമാക്കി.
വെള്ളിയാഴ്ച ഫ്ലോറിഡയിൽ നടന്ന ഒരു പരിപാടിയിൽ സംസാരിക്കവെയാണ് പരാമർശം. നമ്മൾ ഇത് ചെയ്തില്ലായിരുന്നെങ്കിൽ, അവർ ആണവായുധങ്ങൾ കൈവശം വയ്ക്കുമായിരുന്നു, ഇസ്രായേൽ, മിഡിൽ ഈസ്റ്റ്, യൂറോപ്പ് എന്നിവ നശിപ്പിക്കപ്പെടുമായിരുന്നു. ആണവായുധങ്ങൾ അത്തരം ഭ്രാന്തന്മാരുടെ കൈകളിൽ എത്താൻ നമുക്ക് അനുവദിക്കാനാവില്ല.മിഡിൽ ഈസ്റ്റിനെ ആണവ ഭീഷണിയിൽ നിന്ന് അമേരിക്ക വിജയകരമായി രക്ഷിച്ചിട്ടുണ്ടെന്ന് അദ്ദേഹം ഉറപ്പിച്ചു പറഞ്ഞു. യുദ്ധം ഒഴിവാക്കുക എന്ന ലക്ഷ്യത്തോടെ ഇറാനിൽ നിന്നുള്ള ഒരു വാഗ്ദാനം താൻ വീണ്ടും നിരസിച്ചതായും ട്രംപ് സ്ഥിരീകരിച്ചു. ഇതിനുമുമ്പ്, ഏപ്രിൽ 26 നും 27 നും ഇറാൻ നിർദ്ദേശങ്ങൾ സമർപ്പിച്ചിരുന്നു, ഇവ രണ്ടും പിന്നീട് അദ്ദേഹം നിരസിച്ചു.
കൂടാതെ ഒത്തുതീര്പ്പ് നിര്ദ്ദേശങ്ങളില് താന് അതൃപ്തനാണെന്നും കരാറിലെത്താന് ഇറാന് ആഗ്രഹിക്കുന്നുവെന്നും ട്രംപ്. ഇറാന് ഭരണകൂടത്തിനുള്ളില് കടുത്ത ഭിന്നതയുണ്ടെന്നും തുടര് സൈനിക നടപടിയോ സമാധാന കരാറോ ആണ് മുന്നിലുള്ള വഴികളെന്നും ട്രംപ് ചൂണ്ടിക്കാട്ടി.