പാകിസ്ഥാൻ വികസിപ്പിച്ചെടുക്കുന്ന ദീർഘദൂര ബാലിസ്റ്റിക് മിസൈലുകൾ അമേരിക്കയ്ക്ക് ഭാവിയിൽ ഭീഷണിയായേക്കാമെന്ന് യുഎസ് നാഷണൽ ഇൻ്റലിജൻസ് ഡയറക്ടർ തുളസി ഗബ്ബാർഡ്. 2026-ലെ വാർഷിക ഭീഷണി വിലയിരുത്തൽ റിപ്പോർട്ട് യുഎസ് ജനപ്രതിനിധി സഭയിൽ അവതരിപ്പിക്കവെയാണ് അവർ ഇക്കാര്യം വ്യക്തമാക്കിയത്. പാകിസ്ഥാൻ്റെ മിസൈൽ പദ്ധതികൾ കാലക്രമേണ അമേരിക്കൻ മണ്ണിൽ വരെ എത്താൻ ശേഷിയുള്ള ഭൂഖണ്ഡാന്തര ബാലിസ്റ്റിക് മിസൈലുകളായി മാറിയേക്കാമെന്നും റിപ്പോർട്ട് ചൂണ്ടിക്കാട്ടുന്നു. റഷ്യ, ചൈന, ഉത്തര കൊറിയ, ഇറാൻ എന്നിവർക്കൊപ്പം മിസൈൽ സാങ്കേതികവിദ്യയിൽ പാകിസ്ഥാനും അതിവേഗം മുന്നേറുകയാണ്. 2035-ഓടെ ലോകമെമ്പാടുമുള്ള മിസൈലുകളുടെ എണ്ണം 16,000 കടക്കുമെന്നാണ് കണക്കാക്കപ്പെടുന്നത്.

ദക്ഷിണേഷ്യയിലെ സംഘർഷാവസ്ഥ ഇപ്പോഴും ആശങ്കാജനകമായി തുടരുകയാണെന്ന് റിപ്പോർട്ട് വ്യക്തമാക്കുന്നു. കഴിഞ്ഞ വർഷം പഹൽഗാമിലുണ്ടായ ഭീകരാക്രമണം ആണവയുദ്ധ ഭീഷണി ഉയർത്തിയെങ്കിലും പ്രസിഡൻ്റ് ട്രംപിൻ്റെ ഇടപെടൽ സ്ഥിതിഗതികൾ ശാന്തമാക്കാൻ സഹായിച്ചുവെന്ന് തുളസി ഗബ്ബാർഡ് പറഞ്ഞു. പാകിസ്ഥാനും താലിബാനും തമ്മിലുള്ള അതിർത്തി തർക്കങ്ങളും ഭീകരവാദ പ്രവർത്തനങ്ങളും മേഖലയിൽ അസ്ഥിരത സൃഷ്ടിക്കുന്നുണ്ട്. ദക്ഷിണേഷ്യയ്ക്ക് പുറത്തുള്ള ലക്ഷ്യങ്ങൾ ഭേദിക്കാൻ ശേഷിയുള്ള അത്യാധുനിക സാങ്കേതികവിദ്യയാണ് പാകിസ്ഥാൻ നിലവിൽ വികസിപ്പിച്ചുകൊണ്ടിരിക്കുന്നത്. ഹൈപ്പർസോണിക് ആയുധങ്ങളും ആർട്ടിഫിഷ്യൽ ഇൻ്റലിജൻസും ഈ ഭീഷണിയുടെ ആഴം കൂട്ടുന്നുവെന്നും റിപ്പോർട്ടിൽ പറയുന്നു.