കൊട്ടാരക്കര താലൂക്ക് ആശുപത്രിയിൽ ഡ്യൂട്ടിക്കിടെ ഡോക്ടർ വന്ദന ദാസിനെ ക്രൂരമായി കൊലപ്പെടുത്തിയ കേസിൽ പ്രതി സന്ദീപ് കുറ്റം ചെയ്തതായി കൊല്ലം സെഷൻസ് കോടതി നിരീക്ഷിച്ചു. 2023 മെയ് 10-ന് പുലർച്ചെയാണ് കേരളത്തെ നടുക്കിയ ഈ സംഭവം നടന്നത്. പൂയപ്പള്ളി പോലീസ് വൈദ്യപരിശോധനയ്ക്കായി എത്തിച്ച സന്ദീപ്, ആശുപത്രിയിലെ കത്രിക ഉപയോഗിച്ച് ഡോക്ടറെ കുത്തിക്കൊലപ്പെടുത്തുകയായിരുന്നു. സന്ദീപിന്റെ ആക്രമണത്തിൽ പോലീസുകാർ ഉൾപ്പെടെ അഞ്ച് പേർക്ക് പരിക്കേറ്റിരുന്നു. കോട്ടയം മുട്ടുചിറ സ്വദേശികളായ കെ.ജി. മോഹൻദാസിന്റെയും വസന്തകുമാരിയുടെയും ഏക മകളായിരുന്നു ഹൗസ് സർജനായിരുന്ന വന്ദന.

കേസിൽ സ്പെഷ്യൽ പബ്ലിക് പ്രോസിക്യൂട്ടർ പ്രതാപ് ജി. പടിക്കലിന്റെ നേതൃത്വത്തിൽ നടന്ന വിചാരണയിൽ ഡോക്ടർ മുഹമ്മദ് ഷിബിൻ ഉൾപ്പെടെ എഴുപതിലധികം സാക്ഷികളെ വിസ്തരിക്കുകയും 27 പ്രധാന രേഖകൾ ഹാജരാക്കുകയും ചെയ്തു. സംഭവത്തെത്തുടർന്ന് അധ്യാപകനായിരുന്ന സന്ദീപിനെ വിദ്യാഭ്യാസ വകുപ്പ് ജോലിയിൽ നിന്ന് പുറത്താക്കിയിരുന്നു. വന്ദന ദാസിന്റെ ദാരുണമായ മരണം ആരോഗ്യപ്രവർത്തകരുടെ സുരക്ഷ സംബന്ധിച്ച വലിയ ചർച്ചകൾക്ക് വഴിയൊരുക്കുകയും, കർശന ശിക്ഷകൾ വ്യവസ്ഥ ചെയ്യുന്ന ആരോഗ്യപ്രവർത്തക സംരക്ഷണ നിയമഭേദഗതി സർക്കാർ നടപ്പിലാക്കുകയും ചെയ്തു.