അമേരിക്കയിലെ വിർജീനിയയിലുള്ള ഓൾഡ് ഡൊമിനിയൻ യൂണിവേഴ്സിറ്റിയിൽ വ്യാഴാഴ്ച രാവിലെയുണ്ടായ വെടിവെപ്പിൽ അധ്യാപകൻ കൊല്ലപ്പെട്ടു. റിട്ടയർഡ് ആർമി ഓഫീസറും സർവകലാശാലയിലെ ഇൻസ്ട്രക്ടറുമായ ലെഫ്റ്റനന്റ് കേണൽ ബ്രാൻഡൻ ഷായാണ് കൊല്ലപ്പെട്ടത്. ആക്രമണത്തിൽ മറ്റ് രണ്ട് പേർക്ക് പരിക്കേൽക്കുകയും ചെയ്തു. ഐസിസിന് (ISIS) സഹായം നൽകാൻ ശ്രമിച്ച കേസിൽ മുൻപ് ശിക്ഷിക്കപ്പെട്ടിട്ടുള്ള മുഹമ്മദ് ബൈലർ ജല്ലോ (36) എന്നയാളാണ് വെടിയുതിർത്തത്. സംഭവസ്ഥലത്ത് വെച്ച് തന്നെ വിദ്യാർത്ഥികൾ അക്രമിയെ കീഴ്പ്പെടുത്തിയെങ്കിലും പോരാട്ടത്തിനിടയിൽ ഇയാൾ കൊല്ലപ്പെട്ടതായി എഫ്.ബി.ഐ സ്ഥിരീകരിച്ചു. ഈ സംഭവത്തെ ഒരു ഭീകരാക്രമണമായാണ് അന്വേഷണ ഏജൻസികൾ കണക്കാക്കുന്നത്.
മുൻപ് വിർജീനിയ നാഷണൽ ഗാർഡിൽ അംഗമായിരുന്ന ജല്ലോ, ഭീകരവാദ കേസിൽ 11 വർഷത്തെ ജയിൽ ശിക്ഷ കഴിഞ്ഞ് 2024 ഡിസംബറിലാണ് പുറത്തിറങ്ങിയത്. ക്ലാസ് മുറിയിൽ അതിക്രമിച്ച് കയറി 'അല്ലാഹു അക്ബർ' എന്ന് ആക്രോശിച്ചുകൊണ്ട് ഇയാൾ വെടിയുതിർക്കുകയായിരുന്നു. ധീരരായ ഒരു കൂട്ടം വിദ്യാർത്ഥികൾ ഉടൻ തന്നെ ഇയാളെ നേരിടുകയും കൂടുതൽ അത്യാഹിതങ്ങൾ ഒഴിവാക്കുകയും ചെയ്തു. സംഭവത്തെത്തുടർന്ന് സർവകലാശാലയിലെ ക്ലാസുകൾ താത്ക്കാലികമായി നിർത്തിവെച്ചു. ആക്രമണത്തിന് പിന്നിൽ കൂടുതൽ പേരുടെ സഹായമുണ്ടോ എന്ന കാര്യത്തിൽ എഫ്.ബി.ഐയും പ്രാദേശിക പോലീസും വിശദമായ അന്വേഷണം നടത്തിവരികയാണ്.