ന്യൂഡൽഹി: രാജ്യതലസ്ഥാനമായ ഡൽഹിയിലെ ചെങ്കോട്ടയ്ക്ക് സമീപം കഴിഞ്ഞ ദിവസം നടന്നത് ചാവേർ ആക്രമണമാണെന്ന് ദേശീയ അന്വേഷണ ഏജൻസി (എൻ.ഐ.എ.) സ്ഥിരീകരിച്ചു. കാർ ബോംബ് സ്ഫോടനത്തിൽ കൊല്ലപ്പെട്ട ഒൻപത് പേരിൽ ആക്രമണം നടത്തിയ ചാവേറും ഉൾപ്പെടുന്നുണ്ടെന്ന് അന്വേഷണ സംഘം അറിയിച്ചു.മരിച്ചവരുടെ ശരീരഭാഗങ്ങൾ ശാസ്ത്രീയമായി പരിശോധിച്ചതിലൂടെയാണ് സ്ഫോടനം ചാവേർ ആക്രമണമായിരുന്നുവെന്ന് എൻ.ഐ.എ.യ്ക്ക് സ്ഥിരീകരിക്കാൻ സാധിച്ചത്. സ്ഫോടനത്തിന്റെ തീവ്രത വർദ്ധിപ്പിക്കാൻ ഉയർന്ന ശേഷിയുള്ള ഇംപ്രൊവൈസ്ഡ് എക്സ്പ്ലോസീവ് ഡിവൈസ് (ഐ.ഇ.ഡി.) ആണ് ഉപയോഗിച്ചത്. സ്ഫോടകവസ്തുക്കൾ നിറച്ച കാറുമായി വന്നയാൾ സ്വയം പൊട്ടിത്തെറിക്കുകയായിരുന്നു.

ചാവേർ ആക്രമണത്തിന് പിന്നിൽ പ്രവർത്തിച്ച ഭീകരസംഘടനയെക്കുറിച്ച് അന്വേഷണ ഏജൻസികൾക്ക് വ്യക്തമായ സൂചനകൾ ലഭിച്ചിട്ടുണ്ട്. ഭീകരസംഘടനയുടെ നിർദ്ദേശമനുസരിച്ചാണ് ചാവേർ ആക്രമണം നടത്തിയതെന്നാണ് നിഗമനം. പ്രതിയെന്ന് സംശയിക്കുന്ന ഒരാളുടെ ചിത്രം നേരത്തെ ഡൽഹി പോലീസ് പുറത്തുവിട്ടിരുന്നു. ആക്രമണത്തിന്റെ പശ്ചാത്തലത്തിൽ ഡൽഹിയിലെ മെട്രോ സ്റ്റേഷനുകൾ, പ്രധാന സർക്കാർ സ്ഥാപനങ്ങൾ, വിമാനത്താവളങ്ങൾ എന്നിവിടങ്ങളിലെല്ലാം സുരക്ഷാ പരിശോധനകൾ കർശനമാക്കി. സംഭവത്തിൽ സമഗ്രമായ അന്വേഷണം നടത്തുമെന്ന് കേന്ദ്ര ആഭ്യന്തര മന്ത്രി അമിത് ഷാ ഉറപ്പുനൽകിയിട്ടുണ്ട്.