തിരുവനന്തപുരം: ഷാഫി പറമ്പിൽ എം.പിക്ക് നേരെയുണ്ടായ അതിക്രമത്തിൽ ന്യായീകരണവുമായി സി.പി.ഐ.എം. സംസ്ഥാന സെക്രട്ടറി എം.വി. ഗോവിന്ദൻ രംഗത്തെത്തി. സംഘർഷങ്ങളിൽ ഏർപ്പെടുമ്പോൾ ഇത്തരം സംഭവങ്ങൾ ഉണ്ടാകുമെന്ന് മനസ്സിലാക്കണമെന്നും അത് നേരിടാൻ തന്റേടം വേണമെന്നും അദ്ദേഹം പരിഹസിച്ചു. യു.ഡി.എഫ്. ഭരണകാലത്ത് പോലീസ് ഇടതുപക്ഷ പ്രവർത്തകരെ പട്ടിയെ തല്ലും പോലെയാണ് തല്ലിച്ചതച്ചതെന്നും എം.വി. ഗോവിന്ദൻ.

അതേസമയം, കോഴിക്കോട് പേരാമ്പ്രയിലെ സംഘർഷത്തിൽ ഷാഫി പറമ്പിൽ എം.പിക്ക് മർദ്ദനമേറ്റിട്ടില്ലെന്ന പോലീസിന്റെ വാദം തെറ്റാണെന്ന് തെളിയിക്കുന്ന ദൃശ്യങ്ങൾ പുറത്തുവന്നു. പോലീസുകാരൻ ലാത്തി ഉപയോഗിച്ച് ഷാഫി പറമ്പിലിന്റെ തലയ്ക്ക് അടിക്കുന്ന ദൃശ്യങ്ങളാണ് ഇപ്പോൾ പ്രചരിക്കുന്നത്. സംഘർഷത്തിനിടെ ഷാഫി പറമ്പിലിന് നേരെ ലാത്തി പ്രയോഗിച്ചിട്ടില്ലെന്നായിരുന്നു കോഴിക്കോട് റൂറൽ എസ്.പി. പ്രതികരിച്ചിരുന്നത്. ലാത്തികൊണ്ട് പോലീസ് തലയിലും മുഖത്തും അടിക്കുന്ന ദൃശ്യങ്ങളാണ് പുറത്തുവന്നത്. ഈ സംഭവത്തിനിടയിലാണ് ഷാഫി പറമ്പിലിന് പരിക്കേറ്റത്. മൂക്കിന്റെ രണ്ട് എല്ലുകൾക്ക് ഗുരുതരമായ പൊട്ടലുണ്ട്. ഷാഫി പറമ്പിൽ ചികിത്സയിൽ തുടരുകയാണ്.