ആലപ്പുഴ: ദാദാസാഹേബ് ഫാൽക്കെ പുരസ്‌കാരം നേടിയ മോഹൻലാലിനെ ആദരിക്കുന്ന സംസ്ഥാന സർക്കാരിന്റെ ചടങ്ങിന് നൽകിയ 'മലയാളം വാനോളം ലാൽസലാം' എന്ന പേരിനെതിരെ അഭിനേതാക്കളുടെ സംഘടനയായ 'അമ്മ'യുടെ വൈസ് പ്രസിഡന്റ് ജയൻ ചേർത്തല വിമർശനവുമായി രംഗത്ത്. പേരിന് പിന്നിൽ 'പാർട്ടി തത്വങ്ങളുമായി ചേർത്തുകൊണ്ടുപോകാമെന്ന അതിബുദ്ധി'യാണുള്ളതെന്ന് അദ്ദേഹം കുറ്റപ്പെടുത്തി.
കൂടാതെ, 2014-ൽ കേന്ദ്രത്തിൽ ബിജെപി സർക്കാർ അധികാരത്തിൽ വന്നതോടെയാണ് രാജ്യത്ത് സാംസ്‌കാരിക കാഴ്ചപ്പാടുകൾക്ക് മാറ്റംവന്നതെന്നും അദ്ദേഹം ആരോപിച്ചു. ആലപ്പുഴയിൽ കോൺഗ്രസിന്റെ സാംസ്‌കാരിക സംഘടനയായ സംസ്‌കാര സമിതിതിയുടെ പരിപാടിയിൽ സംസാരിക്കുകയായിരുന്നു ജയൻ ചേർത്തല.
ഇന്ന് കേരളം ഭരിക്കുന്ന ഇടതുപക്ഷ പ്രസ്ഥാനങ്ങൾ എവിടെ പരിപാടി നടത്തിയാലും ഏറ്റവും കൂടുതൽ സ്റ്റേജിൽ കാണുന്നത് സിനിമാ നടന്മാരെയാണ് എന്ന് ജയൻ ചേർത്തല വിമർശിച്ചു. കേന്ദ്രവും ഇതുതന്നെയാണ് ചെയ്യുന്നതെന്നും അദ്ദേഹം കുറ്റപ്പെടുത്തി. മോഹൻലാലിനെ ആദരിക്കുന്ന ചടങ്ങിന് 'ലാൽസലാം' എന്ന് പേര് നൽകിയതിനെ അദ്ദേഹം രൂക്ഷമായി വിമർശിച്ചു.
"ഒരു പരിപാടിയുടെ പേരിടുമ്പോൾ പോലും, ലാൽസലാം എന്ന് പേരിട്ടാൽ അതിനെ പാർട്ടിയുടെ തത്വങ്ങളുമായി ചേർത്ത് കൊണ്ടുപോകാമെന്ന അതിബുദ്ധിയോടെയേയും തീക്ഷ്ണബുദ്ധിയോടേയും മുന്നോട്ടുപോയിക്കൊണ്ടിരിക്കുകയാണ്. മുൻകാലങ്ങളിൽ കലയേയും കലാകാരന്മാരേയും ചേർത്ത നിർത്തുമ്പോൾ രാഷ്ട്രീയപ്രസ്ഥാനങ്ങൾക്ക് ഇത്ര ശക്തിയായി, കൂർമബുദ്ധിയോടെ ചിന്തിച്ചെടുക്കാൻ സാധിച്ചിരുന്നില്ല," ജയൻ ചേർത്തല കൂട്ടിച്ചേർത്തു.