D A I L Y  M A L A Y A L A M  N E W S

Archives
SUBSCRIBE
മോഹൻലാലിൻറെ പാൻ ഇന്ത്യൻ ചിത്രം ‘വൃഷഭ’ യുടെ ടീസർ പുറത്ത്
മോഹൻലാലിന്റെ കരിയറിലെ ആദ്യത്തെ രാജകീയ വേഷം കൂടിയാണിത്.

മോഹൻലാൽ നായകനായി എത്തുന്ന ബ്രഹ്മാണ്ഡ പാൻ ഇന്ത്യൻ ഇതിഹാസ ചിത്രം ‘വൃഷഭ’യുടെ ടീസർ പുറത്തിറങ്ങി. കന്നഡ സംവിധായകൻ നന്ദകിഷോർ രചനയും സംവിധാനവും നിർവഹിക്കുന്ന ഈ സിനിമ, കണക്റ്റ് മീഡിയ, ബാലാജി ടെലിഫിലിംസ്, അഭിഷേക് എസ് വ്യാസ് സ്റ്റുഡിയോ എന്നിവർ സംയുക്തമായാണ് നിർമ്മിക്കുന്നത്. കേരളത്തിൽ ചിത്രം വിതരണം ചെയ്യുന്നത് ആശീർവാദ് സിനിമാസ് ആണ്.

ഒരു അച്ഛന്റെയും മകന്റെയും ബന്ധത്തെ ആധാരമാക്കി ഒരുക്കിയ ചിത്രം ആക്ഷനും, വൈകാരിക നിമിഷങ്ങളും, പ്രതികാരവും എല്ലാം കോർത്തിണക്കിയാണ് ഒരുക്കിയിരിക്കുന്നത്. മോഹൻലാലിന്റെ കരിയറിലെ ആദ്യത്തെ രാജകീയ വേഷം കൂടിയാണിത്. ടീസറിൽ രാജകീയ രൂപത്തിൽ ഗംഭീര ലുക്കിലാണ് അദ്ദേഹം എത്തുന്നത്.

മികച്ച താരനിരയും സാങ്കേതിക തികവും കൊണ്ട് ചിത്രം പ്രേക്ഷകരെ ആകർഷിക്കുമെന്ന് ടീസർ സൂചന നൽകുന്നു. രാഗിണി ദ്വിവേദി, സമർജിത് ലങ്കേഷ് എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. എസ്ആർക്കെ, ജനാർദൻ മഹർഷി, കാർത്തിക് എന്നിവർ ചേർന്നാണ് ചിത്രത്തിന്റെ സംഭാഷണങ്ങൾ ഒരുക്കിയത്.

മോഹൻലാലിന്റെ ജന്മദിനത്തിൽ പുറത്തിറങ്ങിയ ഫസ്റ്റ് ലുക്ക് പോസ്റ്ററിനും ടീസർ റിലീസ് പോസ്റ്ററിനും വലിയ സ്വീകാര്യത ലഭിച്ചിരുന്നു. ചിത്രത്തിലെ വിഷ്വൽ ഇഫക്റ്റുകൾ, എഡിറ്റിംഗ്, സൗണ്ട് ഡിസൈൻ എന്നിവയെല്ലാം ചിത്രത്തിന്റെ ആകർഷണീയത വർധിപ്പിക്കും.

2025 ദീപാവലി റിലീസായി എത്താൻ സാധ്യതയുള്ള ഈ ചിത്രം തെലുങ്ക്, മലയാളം, ഹിന്ദി, ഇംഗ്ലീഷ് ഭാഷകളിൽ റിലീസ് ചെയ്യും.
ചിത്രത്തിന്റെ അണിയറ പ്രവർത്തകർ: ഛായാഗ്രഹണം: ആന്റണി സാംസൺ, എഡിറ്റിംഗ്: കെ എം പ്രകാശ്, സംഗീതം: സാം സി എസ്, സൗണ്ട് ഡിസൈൻ: റസൂൽ പൂക്കുട്ടി, ആക്ഷൻ: പീറ്റർ ഹെയ്ൻ, സ്റ്റണ്ട് സിൽവ, നിഖിൽ, പിആർഒ: ശബരി

Leave a Reply

Your email address will not be published. Required fields are marked *