തിരുവനന്തപുരം: ലൈംഗിക ആരോപണങ്ങളെത്തുടർന്ന് യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിലിനെതിരെ ശക്തമായ നിലപാട് സ്വീകരിച്ചതിന് പിന്നാലെ, പ്രതിപക്ഷ നേതാവ് വി ഡി സതീശനെതിരെ രൂക്ഷമായ സൈബർ ആക്രമണം. സതീശന്റെ ഫേസ്ബുക്ക് പോസ്റ്റുകൾക്ക് താഴെ വിമർശനങ്ങളും പരിഹാസങ്ങളും അസഭ്യവർഷങ്ങളും നിറയുകയാണ്. ഈ ആക്രമണങ്ങളിൽ പലതും കോൺഗ്രസ് അനുകൂല സൈബർ ഹാൻഡിലുകളിൽ നിന്നാണെന്നത് ശ്രദ്ധേയമാണ്.

രാഹുൽ മാങ്കൂട്ടത്തിലിന് സോഷ്യൽ മീഡിയയിൽ പ്രതിരോധം തീർക്കുന്ന അതേ ഹാൻഡിലുകൾ തന്നെയാണ് സതീശനെതിരെയും രംഗത്തുള്ളത്. മുഖ്യമന്ത്രിയുമായി ഓണസദ്യ പങ്കിട്ടതിനെയാണ് സൈബർ പോരാളികൾ പ്രധാന ആയുധമാക്കുന്നത്. കഴിഞ്ഞ ദിവസം, റീൽസുകളിലല്ല ജനങ്ങളുടെ ഹൃദയങ്ങളിലാണ് കോൺഗ്രസ് ജീവിക്കുന്നതെന്ന് സതീശൻ തുറന്നടിച്ചതോടെ ആക്രമണങ്ങളുടെ ശക്തി വർധിച്ചു.

യൂത്ത് കോൺഗ്രസ് നേതാവ് സുജിത്തിനെ പോലീസ് മർദിച്ചതിന്റെ സിസിടിവി ദൃശ്യങ്ങൾ പുറത്തുവന്ന ദിവസം മുഖ്യമന്ത്രിയുടെ ഓണവിരുന്നിൽ പങ്കെടുത്തതിനെ മുൻനിർത്തിയാണ് സതീശനെതിരെ ആക്ഷേപങ്ങൾ ഉയരുന്നത്. വാർത്താസമ്മേളനങ്ങളിൽ സംസാരിച്ചാൽ മാത്രം പോരാ, രാഹുലിനെപ്പോലെ മുന്നിൽ നിന്ന് പോരാടണമെന്നാണ് സൈബർ ആക്രമണം നടത്തുന്നവരുടെ പ്രധാന വിമർശനം. രാഹുൽ മാങ്കൂട്ടത്തിലിനെ പുറത്താക്കാൻ കാരണം സതീശനാണെന്നും ഇവർ ആരോപിക്കുന്നു. കസ്റ്റഡി മർദനങ്ങളിൽ മുഖ്യമന്ത്രിയുടെ മൗനം ദുരൂഹമെന്ന് സതീശൻ ഫേസ്ബുക്കിൽ കുറിച്ചപ്പോൾ അതിനു താഴെയും അധിക്ഷേപ കമന്റുകളാണ് നിറഞ്ഞത്.

പ്രതിപക്ഷ നേതാവിനെതിരെയുള്ള ഈ കടന്നാക്രമണം പരിധിവിട്ടിട്ടും കോൺഗ്രസ് നേതൃത്വത്തിലെ പ്രമുഖ നേതാക്കളൊന്നും പ്രതിരോധവുമായി രംഗത്തെത്തിയില്ല. നേതാക്കളുടെ മൗനത്തിൽ സതീശനോടൊപ്പമുള്ളവർക്ക് അതൃപ്തിയുണ്ട്. നേതാക്കളുടെ മൗനം "കുലം മുടിക്കാനുള്ള പ്രോത്സാഹനം" ആണെന്ന് ഒരു യൂത്ത് കോൺഗ്രസ് നേതാവ് വിമർശിച്ചു. അതേസമയം, റോജി എം ജോൺ എംഎൽഎ സതീശന് പിന്തുണയുമായി രംഗത്തെത്തിയിട്ടുണ്ട്.