തിരുവനന്തപുരം: മുഖ്യമന്ത്രി പിണറായി വിജയനൊപ്പം പ്രതിപക്ഷ നേതാവ് വി.ഡി.സതീശൻ ഓണസദ്യ കഴിച്ചതിനെതിരെ കെപിസിസി മുൻ അധ്യക്ഷൻ കെ.സുധാകരൻ എംപി രംഗത്ത്. കുന്നംകുളം പൊലീസ് സ്റ്റേഷനിൽ യൂത്ത് കോൺഗ്രസ് നേതാവ് വി.എസ്.സുജിത്തിനെ കസ്റ്റഡിയിൽ മർദ്ദിക്കുന്ന ദൃശ്യങ്ങൾ പുറത്തുവന്നതിനു തൊട്ടുപിന്നാലെ മുഖ്യമന്ത്രിയുടെ വിരുന്നിൽ സതീശൻ പങ്കെടുത്തത് ശരിയായില്ലെന്ന് സുധാകരൻ മാധ്യമങ്ങളോട് പറഞ്ഞു. "ഞാനായിരുന്നെങ്കിൽ അത് ചെയ്യില്ലായിരുന്നു, മോശമായിപ്പോയി," സുധാകരൻ പ്രതികരിച്ചു.

രാഷ്ട്രീയ നേതാക്കൾക്കും പ്രമുഖ വ്യക്തികൾക്കുമായി മുഖ്യമന്ത്രി ഒരുക്കിയ ഓണവിരുന്നിലാണ് വി.ഡി.സതീശൻ പങ്കെടുത്തത്. നിയമസഭാ മന്ദിരത്തിൽ നടന്ന ചടങ്ങിൽ, മുഖ്യമന്ത്രിയുടെ തൊട്ടടുത്താണ് സതീശൻ സദ്യ കഴിച്ചത്. സംഭവം അന്നുതന്നെ വിവിധ കോണുകളിൽ നിന്ന് വിമർശനങ്ങൾക്ക് വഴിവെച്ചിരുന്നു. ഇതിനു പിന്നാലെയാണ് ഇപ്പോൾ കെ.സുധാകരനും പരസ്യമായി രംഗത്തെത്തിയിരിക്കുന്നത്.

അതേസമയം, കുന്നംകുളം പൊലീസ് സ്റ്റേഷനിൽ ക്രൂരമായ മർദ്ദനമേറ്റ യൂത്ത് കോൺഗ്രസ് ചൊവ്വന്നൂർ മണ്ഡലം പ്രസിഡന്റ് വി.എസ്.സുജിത്തിനെ വി.ഡി.സതീശൻ നേരിട്ടെത്തി സന്ദർശിച്ചിരുന്നു. കുറ്റക്കാരായ പൊലീസ് ഉദ്യോഗസ്ഥർക്കെതിരെ രൂക്ഷമായ ഭാഷയിലാണ് സതീശൻ പ്രതികരിച്ചത്. ഒരു കോൺഗ്രസുകാരനെ മർദ്ദിച്ച നാല് ഉദ്യോഗസ്ഥരും കാക്കി ധരിച്ച് വീടിന് പുറത്തിറങ്ങില്ലെന്നും, നടപടിയെടുത്തില്ലെങ്കിൽ കേരളം ഇതുവരെ കണ്ടിട്ടില്ലാത്ത സമരം കോൺഗ്രസ് നടത്തുമെന്നും സതീശൻ മുന്നറിയിപ്പ് നൽകി.