ശബരിമല സ്വർണ്ണ മോഷണക്കേസിലെ മുഖ്യപ്രതിയായ ഉണ്ണികൃഷ്ണൻ പോറ്റി, മുൻ മന്ത്രി കടകംപള്ളി സുരേന്ദ്രനെതിരെ നൽകിയ ഗൂഢാലോചന പരാതിയിൽ പോലീസ് അന്വേഷണം ആരംഭിക്കുന്നു. ഭൂമി തട്ടിപ്പ് കേസിൽ തന്നെ കുടുക്കാൻ കടകംപള്ളി സുരേന്ദ്രൻ ശ്രമിച്ചുവെന്നാരോപിച്ച് ഡിജിപിക്ക് നൽകിയ പരാതി, തിരുവനന്തപുരം സിറ്റി പോലീസ് കമ്മീഷണർ വഴി തുമ്പ പോലീസിന് കൈമാറും. പ്രാഥമിക അന്വേഷണത്തിന് ശേഷമായിരിക്കും കേസ് രജിസ്റ്റർ ചെയ്യുന്ന കാര്യത്തിൽ അന്തിമ തീരുമാനമെടുക്കുക.
തനിക്കെതിരെ കഴക്കൂട്ടം സ്വദേശിയായ പ്രതിഭയെക്കൊണ്ട് വ്യാജ പരാതി നൽകിപ്പിച്ചുവെന്നും, താൻ നിയമപരമായി വില നൽകിയാണ് ഈ ഭൂമി വാങ്ങിയതെന്നും ഉണ്ണികൃഷ്ണൻ പോറ്റി തന്റെ പരാതിയിൽ അവകാശപ്പെടുന്നു. 2020-ൽ നടന്ന ഒരു ഇടപാടുമായി ബന്ധപ്പെട്ടാണ് ഈ തർക്കം നിലനിൽക്കുന്നത്. ഈടായി വാങ്ങിയ ഭൂമി ഉണ്ണികൃഷ്ണൻ മറിച്ചുവിറ്റെന്ന പരാതിയിൽ പോലീസ് അന്വേഷണം തുടരുന്നതിനിടെയാണ് കടകംപള്ളിക്കെതിരെ പോറ്റി ഇത്തരമൊരു ആരോപണവുമായി രംഗത്തെത്തിയത്. രാഷ്ട്രീയ വൃത്തങ്ങളിലും പോലീസ് തലപ്പത്തും ഈ നീക്കം വലിയ ചർച്ചകൾക്ക് വഴിവെച്ചിട്ടുണ്ട്.