യഷ് നായകനാകുന്ന 'ടോക്സിക്' എന്ന ചിത്രത്തിനെതിരെ കർണാടകയിൽ ആം ആദ്മി പാർട്ടി (AAP) വനിതാ വിഭാഗം പ്രതിഷേധവുമായി രംഗത്തെത്തി. ചിത്രത്തിലെ ഉള്ളടക്കം അങ്ങേയറ്റം അശ്ലീലമാണെന്ന് ആരോപിച്ച് പാർട്ടി പ്രതിനിധികൾ കർണാടക സംസ്ഥാന വനിതാ കമ്മീഷന് ഔദ്യോഗികമായി പരാതി നൽകി. ഗീതു മോഹൻദാസ് സംവിധാനം ചെയ്യുന്ന ഈ ചിത്രം സ്ത്രീകളെ അപമാനിക്കുന്ന തരത്തിലുള്ളതാണെന്നും അമിതമായ അശ്ലീലത നിറഞ്ഞതാണെന്നുമാണ് എഎപി നേതാക്കളുടെ പ്രധാന ആരോപണം. തിങ്കളാഴ്ചയാണ് ഇതുസംബന്ധിച്ച പരാതി കമ്മീഷന് സമർപ്പിച്ചത്.

ചിത്രത്തിലെ രംഗങ്ങൾ പൊതുസമൂഹത്തിന് അനുയോജ്യമാണോ എന്ന് പരിശോധിക്കണമെന്നും ഈ വിഷയത്തിൽ അടിയന്തര നടപടി സ്വീകരിക്കണമെന്നും വനിതാ കമ്മീഷനോട് പാർട്ടി ആവശ്യപ്പെട്ടു. നേരത്തെ പുറത്തിറങ്ങിയ ചിത്രത്തിന്റെ ടീസറിലെ ചില ഭാഗങ്ങൾ സ്ത്രീകളെ വസ്തുവൽക്കരിക്കുന്നതാണെന്ന തരത്തിൽ സംവിധായിക ഗീതു മോഹൻദാസിനെതിരെ വലിയ വിമർശനങ്ങൾ ഉയർന്നിരുന്നു. യഷ് നായകനാകുന്ന ബിഗ് ബജറ്റ് ചിത്രം എന്ന നിലയിൽ വലിയ പ്രതീക്ഷയോടെ കാത്തിരിക്കുന്ന ആരാധകർക്കിടയിൽ ഈ പുതിയ നിയമനടപടി വലിയ ചർച്ചയായി മാറിയിരിക്കുകയാണ്.