പാലക്കാട് ജില്ലയിൽ നടക്കാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പിൽ പലയിടത്തും സ്ഥാനാർഥികളെ നിർത്താൻ കഴിയാതെ ബിജെപി പ്രതിസന്ധിയിൽ. ജില്ലയിലെ 11 പഞ്ചായത്തുകളിലായി ആകെ 43 വാർഡുകളിലാണ് ബിജെപിക്ക് സ്ഥാനാർഥികളില്ലാത്തത്. ചിറ്റൂർ തത്തമംഗലം നഗരസഭയിൽ അഞ്ച് വാർഡുകളിലും കാഞ്ഞിരപ്പുഴയിൽ എട്ട് വാർഡുകളിലും മത്സരിക്കാൻ സ്ഥാനാർഥികളെ കണ്ടെത്താനായിട്ടില്ല. സ്ഥാനാർഥികളില്ലാത്ത വാർഡുകളിൽ സ്വതന്ത്രരെ പിന്തുണക്കേണ്ടതില്ലെന്നും ബിജെപി നേതൃത്വം അറിയിച്ചിട്ടുണ്ട്.

കഴിഞ്ഞ തവണ ബിജെപി മുഖ്യപ്രതിപക്ഷമായിരുന്ന പുതുനഗരം പഞ്ചായത്തിൽ നാല് വാർഡുകളിലും, ആലത്തൂർ, അലനല്ലൂർ പഞ്ചായത്തുകളിൽ അഞ്ച് വാർഡുകളിലും ബിജെപിക്ക് സ്ഥാനാർഥികളില്ല. കൂടാതെ, വടകരപ്പതി, പുതുനഗരം, വണ്ടാഴി, പെരുമാട്ടി പഞ്ചായത്തുകളിൽ നാല് വാർഡുകൾ വീതവും, കാരാകുറുശ്ശി, വടക്കഞ്ചേരി പഞ്ചായത്തുകളിൽ മൂന്ന് വാർഡുകൾ വീതവും, കിഴക്കഞ്ചേരിയിൽ രണ്ട് വാർഡുകളിലും മങ്കരയിൽ ഒരു വാർഡിലും ബിജെപിക്ക് സ്ഥാനാർഥികളില്ല. ജില്ലയിലെ പ്രധാന പഞ്ചായത്തുകളിലെല്ലാം സ്ഥാനാർഥികളെ നിർത്താൻ കഴിയാത്തത് തിരഞ്ഞെടുപ്പിൽ ബിജെപിക്ക് വലിയ തിരിച്ചടിയാകാൻ സാധ്യതയുണ്ട്.