സാംസ്കാരിക മന്ത്രി സജി ചെറിയാൻ ഒരു പൊതുപരിപാടിക്കിടെ 'വേടനു പോലും സിനിമ അവാർഡ് കിട്ടി' എന്ന് നടത്തിയ പരാമർശം വിവാദത്തിൽ. പിന്നാലെ തിരുത്തുമായി മന്ത്രി, കുട്ടികളുടെ സിനിമാ അവാർഡ് സംബന്ധിച്ച വിഷയം സംസാരിക്കുന്നതിനിടയിൽ വന്ന 'നാക്ക് പിഴയാണ്' അതെന്നും തന്റെ പ്രയോഗം തെറ്റായിപ്പോയെന്നും മന്ത്രി പിന്നീട് തിരുത്തി. പുരസ്‌കാര പ്രഖ്യാപനത്തിന് പിന്നാലെ വേടൻ എഴുതിയ വരികളെ പിന്തുണച്ചും നിരവധി പേർ രംഗത്തെത്തിയിട്ടുണ്ട്.
സംസ്ഥാന ചലച്ചിത്ര പുരസ്‌കാര പ്രഖ്യാപനത്തിൽ 'മഞ്ഞുമ്മൽ ബോയ്സ്' എന്ന ചിത്രത്തിലെ 'വിയർപ്പ് തുന്നിയിട്ട കുപ്പായം' എന്ന ഗാനത്തിന് മികച്ച ഗാനരചയിതാവിനുള്ള പുരസ്‌കാരമാണ് റാപ്പർ വേടന് (ഹിരൺദാസ് മുരളി) ലഭിച്ചത്. റാപ്പ് സംഗീത ശാഖയിൽ നിന്നും ഒരു ഗാനരചയിതാവിന് സംസ്ഥാന പുരസ്‌കാരം ലഭിക്കുന്നത് ഇതാദ്യമാണ്. എന്നാൽ, വേടന് അവാർഡ് നൽകിയതിനെതിരെ സോഷ്യൽ മീഡിയയിലും സാംസ്കാരിക രംഗത്തും വ്യാപകമായ വിമർശനങ്ങൾ ഉയർന്നിട്ടുണ്ട്.
ലൈംഗിക പീഡന ആരോപണങ്ങൾ നേരിട്ട വ്യക്തിക്ക് ജനങ്ങളുടെ നികുതിപ്പണത്തിൽ നിന്ന് പുരസ്‌കാരം നൽകുന്നത് ശരിയാണോ എന്ന ചോദ്യമാണ് പ്രധാനമായും ഉയർന്നുവന്നത്. ജൂറി ചെയർമാൻ പ്രകാശ് രാജ്, വേടന്റെ രചനയെ ന്യായീകരിച്ചുകൊണ്ട് രംഗത്തെത്തി. വേടൻ ഇന്നത്തെ തലമുറയുടെ ശബ്ദമാണെന്നും, അദ്ദേഹത്തിന്റെ വരികളിലെ അതിജീവനത്തിനുള്ള ത്വര കണ്ടില്ലെന്ന് നടിക്കാൻ കഴിയില്ലെന്നും പ്രകാശ് രാജ് അഭിപ്രായപ്പെട്ടു. എന്നാൽ, നടൻ ജോയ് മാത്യു, എഴുത്തുകാരി ഇന്ദുമേനോൻ അടക്കമുള്ള പ്രമുഖർ പുരസ്‌കാര നിർണയത്തിനെതിരെ ശക്തമായ വിമർശനം ഉയർത്തി.വിവാദങ്ങൾക്കിടയിലും, 'കലാകാരൻ എന്ന നിലയിൽ മുന്നോട്ട് വെക്കുന്ന രാഷ്ട്രീയത്തിന് ലഭിച്ച അംഗീകാരമായി പുരസ്‌കാരത്തെ കാണുന്നു'വെന്ന് വേടൻ പ്രതികരിച്ചു.