മകനെ വിവാദത്തിലേക്ക് വലിച്ചിഴക്കാൻ ശ്രമം നടക്കുന്നുണ്ടെന്ന് മുഖ്യമന്ത്രി പിണറായി വിജയൻ പറഞ്ഞു.തന്റെ രാഷ്ട്രീയം സുതാര്യവും കളങ്കരഹിതവുമാണ്. മക്കളും കളങ്കരഹിതരാണ്. മക്കൾ ദുഷ്പേരുണ്ടാക്കുന്ന പല സംഭവങ്ങളും നമ്മൾ കണ്ടിട്ടുണ്ട്. തന്റെ മക്കൾ ഒരു ദുഷ്പേരും ഉണ്ടാക്കിയിട്ടില്ല. തന്റെ മകൻ മര്യാദയ്ക്ക് ജോലി ചെയ്യുന്നയാളാണ്. മകൻ ഒരു അധികാര ഇടനാഴിയിലും വരുന്നയാളല്ലെന്നും മുഖ്യമന്ത്രി വാർത്താസമ്മേളനത്തിൽ വ്യക്തമാക്കി.

മക്കളെക്കുറിച്ച് ഓർക്കുമ്പോൾ തനിക്ക് പ്രത്യേകമായ അഭിമാനം തോന്നുന്നു. ഏജൻസികളെ ഉപയോഗിച്ച് ഇത്തരം കാര്യങ്ങളെ മറ്റൊരു രീതിയിൽ ചിത്രീകരിക്കാൻ ശ്രമിച്ചു. അതുകൊണ്ട് വിവാദമുണ്ടാകുമോ? സമൻസ് ആർക്കാണ് കൊടുത്തത്? എവിടെയാണ് കൊടുത്തത്? ആരുടെയും കൈയ്യിൽ സമൻസ് കിട്ടിയിട്ടില്ലല്ലോ എന്നും മുഖ്യമന്ത്രി ചോദിച്ചു.

എന്തെല്ലാം കണ്ടതാണ്. ഏതെല്ലാം തരത്തിൽ സ്നേഹ വാത്സല്യങ്ങൾ അനുഭവിച്ച ആളാണ് താനെന്നും മുഖ്യമന്ത്രി പറഞ്ഞു. ഇതൊന്നും ഏശില്ല. എത്ര കൊല്ലമായി ഇത് തുടങ്ങിയിട്ട്. ഇതൊക്കെ ശരിയായ രീതിയിൽ നേരിടാനറിയാം. ഒരു അഴിമതിയും തനിക്ക് ഉണ്ടായിട്ടില്ലെന്നും മുഖ്യമന്ത്രി പറഞ്ഞു. അതേസമയം, സമൻസ് വിവാദത്തിൽ സിപിഐഎം ജനറൽ സെക്രട്ടറി എം.എ. ബേബിയുടെ പരാമർശത്തെ മുഖ്യമന്ത്രി തള്ളി. എം.എ. ബേബിയുടേത് വസ്തുത മനസ്സിലാക്കിയുള്ള പ്രതികരണമായിരിക്കില്ലെന്നും അദ്ദേഹം കൂട്ടിച്ചേർത്തു.

10 വർഷത്തെ ഭരണത്തിൽ അഭിമാനിക്കാൻ ഏറെയുണ്ട്. കളങ്കിതനാക്കാൻ ശ്രമിച്ചപ്പോൾ താൻ ഉള്ളാലെ ചിരിച്ചു നിന്നിട്ടുണ്ട്. ഇവിടെ പദ്ധതികൾക്ക് കമ്മീഷനില്ല. മറ്റ് സ്ഥലത്ത പോലെയല്ല. അഴിമതിയുമായി ബന്ധപ്പെട്ട കാര്യങ്ങൾ അനുവദിക്കില്ല. അതിൽ അഭിമാനം ഉണ്ടെന്നും മുഖ്യമന്ത്രി പറഞ്ഞു.