തിരുവനന്തപുരം: ശബരിമല സ്വര്‍ണപ്പാളി വിവാദത്തിൽ സർക്കാരിനെതിരെ രൂക്ഷ വിമർശനവുമായി പ്രതിപക്ഷ നേതാവ് വി ഡി സതീശൻ. ശബരിമലയിലെ ദ്വാരപാലക ശിൽപം ഒരു കോടീശ്വരന് വിറ്റു എന്നും, അത് ആർക്കാണ് വിറ്റതെന്ന് മുൻ ദേവസ്വം മന്ത്രി കടകംപള്ളി സുരേന്ദ്രനോട് ചോദിച്ചാൽ അറിയാമെന്നും അദ്ദേഹം ആരോപിച്ചു.

സ്വർണം ചെമ്പാക്കിയ രാസവിദ്യയാണ് ശബരിമലയിൽ നടന്നത്. സർക്കാർ ഒരു പത്രസമ്മേളനം നടത്തി എന്താണ് സംഭവിച്ചതെന്ന് വ്യക്തമാക്കണമെന്നും വിഡി സതീശൻ ആവശ്യപ്പെട്ടു. എന്താണ് ഇത്രയും നാളായി മിണ്ടാതെ ഇരിക്കുന്നത് എന്നും അദ്ദേഹം ചോദിച്ചു. നിയമസഭയ്ക്കകത്തും പുറത്തും കോൺഗ്രസ് പ്രതിഷേധം തുടരുമെന്ന് അറിയിച്ച പ്രതിപക്ഷ നേതാവ്, കട്ടളപ്പടിയും വാതിലും എല്ലാം അടിച്ചുകൊണ്ടുപോയി. ഇപ്രാവശ്യം അയ്യപ്പവിഗ്രഹം കൂടി കൊണ്ടുപോകാനായിരുന്നു പ്ലാൻ എന്നും രൂക്ഷമായി പരിഹസിച്ചു.

പൊലീസിനെ വിശ്വാസമില്ലാത്തതുകൊണ്ടാണ് സിബിഐ അന്വേഷണം ആവശ്യപ്പെട്ടതെന്ന് വി ഡി സതീശൻ വ്യക്തമാക്കി. സർക്കാരിനോടല്ല പ്രത്യേക അന്വേഷണ സംഘം രൂപീകരിക്കാൻ ആവശ്യപ്പെട്ടതെന്നും അദ്ദേഹം കൂട്ടിച്ചേർത്തു. അതേസമയം, ഹൈക്കോടതിയുടെ നിരീക്ഷണത്തിലുള്ള അന്വേഷണത്തിന് യുഡിഎഫ് എതിരല്ല. സ്വർണ്ണപ്പാളി വിറ്റത് കേരളത്തിന് പുറത്തുള്ള സംസ്ഥാനത്താണ്. "ഇനി കൊണ്ടുപോകാൻ അയ്യപ്പവിഗ്രഹം മാത്രമാണ് ഉള്ളത്. അതിനുവേണ്ടിയാണ് ഉണ്ണികൃഷ്ണൻ പോറ്റിയെ വീണ്ടും വിളിച്ചു വരുത്തിയത്. ഉണ്ണികൃഷ്ണൻ പോറ്റി കുടുങ്ങിയാൽ എല്ലാവരും കുടുങ്ങും," എന്നും വി ഡി സതീശൻ ആരോപിച്ചു.