തിരുവനന്തപുരം: ശബരിമലയിലെ സ്വർണപ്പാളി വിവാദത്തിൽ പ്രതിപക്ഷ നേതാവ് വി.ഡി. സതീശൻ സി.ബി.ഐ. അന്വേഷണം ആവശ്യപ്പെട്ടു. സ്വർണം അടിച്ചുമാറ്റിയാണ് ചെന്നൈയിൽ എത്തിച്ചതെന്ന് അദ്ദേഹം ആരോപിച്ചു. സ്വർണം നഷ്ടപ്പെട്ടത് ഈ സമയത്താണോ എന്നും, പകരം ചെമ്പ് പാളി ഉണ്ടാക്കിയത് ഇതിനിടയിലാണോ എന്നും സംശയിക്കുന്നതായി സതീശൻ പറഞ്ഞു. 1998-ൽ വിജയ് മല്യ നൽകിയ സ്വർണത്തിൽ എത്ര ബാക്കിയുണ്ടെന്നും, കൊണ്ടുപോയ സാധനങ്ങൾ 40-ഓളം ദിവസം എവിടെയായിരുന്നുവെന്നും സർക്കാർ വ്യക്തമാക്കണം. ദേവസ്വം ബോർഡിലെയും സർക്കാരിലെയും പല ആളുകളും സ്വർണത്തിന്റെ പങ്കുപറ്റിയിട്ടുണ്ട്. ഇപ്പോഴത്തെ ദേവസ്വം ബോർഡ് മന്ത്രിക്കെതിരെയും പഴയ ദേവസ്വം മന്ത്രിക്കെതിരെയും അന്വേഷണം വേണം.ദേവസ്വം പ്രസിഡന്റുമാർക്കെതിരെയും സി.ബി.ഐ. അന്വേഷണം വേണമെന്ന് വി.ഡി. സതീശൻ ആവശ്യപ്പെട്ടു.

അതേസമയം, ശബരിമല സ്വര്‍ണപ്പാളി വിവാദത്തിൽ ദേവസ്വം ബോർഡിനെ കുടുക്കിക്കൊണ്ട് ഉണ്ണിക്കൃഷ്ണൻ പോറ്റിയുടെ തുറന്നുപറച്ചിൽ പുറത്തുവന്നു."ചെമ്പെന്ന് പറഞ്ഞത് ദേവസ്വം ബോർഡാണ്," എന്നും രേഖകളിലും ചെമ്പാണ് രേഖപ്പെടുത്തിയിരിക്കുന്നതെന്നും ഉണ്ണിക്കൃഷ്ണൻ പോറ്റി പറഞ്ഞു. സ്വർണം നഷ്ടപ്പെട്ടതിനാലാകാം രേഖകളിൽ ചെമ്പെന്ന് കാണിച്ചതെന്നും അദ്ദേഹം സംശയം പ്രകടിപ്പിച്ചു. സ്വർണപ്പാളി പ്രദർശന വസ്തുവാക്കിയിട്ടില്ല. പീഠം കാണാതായെന്ന് താൻ പരാതി പറഞ്ഞിട്ടില്ല. തനിക്ക് വേണ്ടി മെയിൽ അയച്ചത് സഹായിയായ വാസുദേവനാണ്. വാസുദേവനെ രക്ഷിക്കാനാണ് താൻ ആ കാര്യം മറച്ചുവെച്ചത് എന്നും അദ്ദേഹം വെളിപ്പെടുത്തി.