തിരുവനന്തപുരം: ഇന്ത്യൻ ചലച്ചിത്രരംഗത്തെ പരമോന്നത ബഹുമതിയായ ദാദാസാഹേബ് ഫാൽക്കെ പുരസ്‌കാരം നേടിയ മലയാളത്തിന്റെ മഹാനടൻ മോഹൻലാലിന് സംസ്ഥാന സർക്കാർ ആദരം അർപ്പിച്ചു. തിരുവനന്തപുരത്ത് സംഘടിപ്പിച്ച ‘മലയാളം വാനോളം ലാൽസലാം’ എന്ന പ്രത്യേക പരിപാടിയിലാണ് കേരളം തങ്ങളുടെ പ്രിയതാരത്തെ ആദരിച്ചത്. സംസ്ഥാന സർക്കാരിന്റെ ആദരം ഏറ്റുവാങ്ങിക്കൊണ്ട് സംസാരിച്ച മഹാനടൻ മോഹൻലാൽ താൻ അനുഭവിക്കുന്ന വൈകാരിക നിമിഷത്തെക്കുറിച്ച് മനസ്സുതുറന്നു.
ഡൽഹിയിൽ വെച്ച് പുരസ്‌കാരം ഏറ്റുവാങ്ങിയതിനേക്കാൾ ഏറെ വൈകാരികമായാണ് താൻ ഇപ്പോൾ ഈ വേദിയിൽ നിൽക്കുന്നതെന്ന് അദ്ദേഹം പറഞ്ഞു."ഇത് ഞാൻ ജനിച്ചുവളർന്ന് കൗമാരവും യൗവനവും ചെലവഴിച്ച മണ്ണാണ്. എൻ്റെ അമ്മയും അച്ഛനും ജ്യേഷ്ഠനും ജീവിച്ച ഇടമാണ്. എന്നെ ഞാനാക്കി മാറ്റിയ കേരളവും മലയാളികളും അവർ തിരഞ്ഞെടുത്ത സർക്കാരുമാണ് എനിക്ക് ഈ സ്വീകരണം നൽകുന്നത്," മോഹൻലാൽ പറഞ്ഞു. "ഈ കാര്യങ്ങൾ കൊണ്ടെല്ലാം ഞാനനുഭവിക്കുന്ന വൈകാരിക ഭാരത്തെ മറച്ചുപിടിക്കാൻ കാലങ്ങളായി ഞാൻ ആർജിച്ച അഭിനയശേഷിക്ക് പോലും സാധിക്കുന്നില്ല," എന്ന് വികാരാധീനനായി അദ്ദേഹം കൂട്ടിച്ചേർത്തു.
48 വർഷം നീണ്ട തന്റെ അഭിനയ ജീവിതത്തെ ഒരു മഹാനദിയായാണ് ആദരം സ്വീകരിച്ചുകൊണ്ട് മോഹൻലാൽ ഉപമിച്ചത്. "ആ മഹാനദിയിലേക്ക് വീണ ഒരു ഇലയാണ് ഞാൻ. ഒഴുക്കിൽ മുങ്ങിപ്പോവുമ്പോഴെല്ലാം ആ ഇലയെ ഏതൊക്കെയോ കൈകൾ വന്ന് താങ്ങി," അദ്ദേഹം പറഞ്ഞു. "പ്രതിഭയുടെ കൈയൊപ്പുള്ള കൈകളായിരുന്നു അവയെല്ലാം—വലിയ എഴുത്തുകാർ, സംവിധായകർ, നിർമാതാക്കൾ… എൻ്റെ മുഖത്ത് ചായം തേച്ച് കഥാപാത്രങ്ങളിലേക്ക് വെളിച്ചമടിച്ചവർ… ഞാൻ ചെയ്തതെല്ലാം മടുപ്പില്ലാതെ കണ്ടിരുന്ന എൻ്റെ പ്രിയപ്പെട്ട മലയാളികൾ… ഇതുതന്നെയാണോ എൻ്റെ തൊഴിൽ എന്നാലോചിക്കുമ്പോഴെല്ലാം 'ലാലേട്ടാ' എന്ന് സ്‌നേഹത്തോടെ എന്നെ വിളിച്ചുണർത്തിയവർ."
"ഇപ്പോഴും ഞാനാ മഹാനദിയുടെ പ്രവാഹത്തിലാണ്. മുങ്ങിപ്പോകുമ്പോഴെല്ലാം ആരൊക്കെയോ പിടിച്ചുയർത്തുന്നു. ഇനിയും ഒഴുകൂ എന്നു പറയുന്നു. നന്ദി ആരോടു ഞാൻ ചൊല്ലേണ്ടൂ.." മോഹൻലാൽ വികാരാധീനനായി സംസാരം നിർത്തി. തുടർന്ന്, മുഖ്യമന്ത്രി പിണറായി വിജയൻ മോഹൻലാലിന് പൊന്നാടയണിയിച്ച് സ്വീകരണം നൽകി. കേരള സർക്കാരിനുവേണ്ടി കവി പ്രഭാവർമ എഴുതിയ പ്രശസ്തി പത്രം മുഖ്യമന്ത്രി അദ്ദേഹത്തിന് സമർപ്പിച്ചു. ഗായിക ലക്ഷ്മിദാസ് പ്രശസ്തി പത്രം കവിതയായി ചൊല്ലി.
മുഖ്യമന്ത്രിയുടെ വാക്കുകൾ
ലോകമെങ്ങുമുള്ള മലയാളികൾ നെഞ്ചിലേറ്റിയ ചലച്ചിത്ര താരമാണ് മോഹൻലാൽ. വെള്ളിത്തിരയിൽ അദ്ദേഹം തന്മയത്വത്തോടെ പകർന്നാടിയ വേഷങ്ങൾ നമ്മുടെ സാംസ്‌കാരിക ബോധത്തിന്റെ ഭാഗമാണെന്ന് തന്നെ പറയാം. ഇന്ന് തിരുവനന്തപുരത്തെ സെൻട്രൽ സ്റ്റേഡിയത്തിൽ വെച്ച് ദാദാ സാഹേബ് ഫാൽക്കേ അവാർഡ് ജേതാവായ മോഹൻലാലിനെ കേരളം ആദരിച്ചു. ജനസാഗരം ഒഴുകിയെത്തിയ ചടങ്ങിൽ പങ്കുചേരാനായത് ആവേശകരമായ അനുഭവമായി. സംസ്ഥാനത്തെ പ്രമുഖരെല്ലാം ഒത്തുചേർന്ന സ്വീകരണ പരിപാടി മോഹൻലാലെന്ന പ്രതിഭയ്ക്ക് നമ്മുടെയെല്ലാം മനസ്സിലുള്ള സ്ഥാനത്തെ അടിവരയിടുന്നതായിരുന്നു. തന്റെ കലാസപര്യ കൂടുതൽ തിളക്കത്തോടെ മുന്നോട്ടു കൊണ്ടുപോകാൻ അദ്ദേഹത്തിന് സാധിക്കട്ടെയെന്ന് ആശംസിക്കുന്നു.