ചെന്നൈ: തമിഴ്‌നാട്ടിലെ കരൂരിൽ ടിവികെ റാലിക്കിടെയുണ്ടായ ആൾക്കൂട്ട ദുരന്തത്തിൽ നിരവധി പേർ മരിച്ച സംഭവത്തിന് പിന്നാലെ, ജെൻസി മോഡൽ പ്രക്ഷോഭത്തിന് ആഹ്വാനം ചെയ്തതിന് ടിവികെ ജനറൽ സെക്രട്ടറി ആധവ് അർജുനയ്‌ക്കെതിരെ പോലീസ് കേസെടുത്തു. ശ്രീലങ്ക-നേപ്പാൾ മാതൃകയിലുള്ള പ്രക്ഷോഭം വേണമെന്ന് ആവശ്യപ്പെട്ടുകൊണ്ടുള്ള പോസ്റ്റാണ് കേസിന് ആധാരം.
ടിവികെ പ്രവർത്തകനെ പോലീസ് തല്ലുന്ന ദൃശ്യങ്ങൾക്കൊപ്പം ആയിരുന്നു ടിവികെ ജനറൽ സെക്രട്ടറി ആധവ് അർജുനയുടെ വിവാദമായ സോഷ്യൽ മീഡിയ പോസ്റ്റ്. 'യുവജന വിപ്ലവത്തിന് സമയമായെന്ന്' കുറിപ്പിൽ പറഞ്ഞ അദ്ദേഹം, ശ്രീലങ്കയും നേപ്പാളും ആവർത്തിക്കാനും ആഹ്വാനം ചെയ്തിരുന്നു.ഈ പോസ്റ്റിനെതിരെ ഡിഎംകെ രൂക്ഷ വിമർശനം ഉയർത്തി. ആധവ് അർജുന നടത്തിയത് കലാപാഹ്വാനമാണെന്ന് ഡിഎംകെ വക്താവ് ശരവണൻ അണ്ണാദുരൈ ആരോപിക്കുകയും അദ്ദേഹത്തിനെതിരെ കേസെടുക്കണമെന്ന് ആവശ്യപ്പെടുകയും ചെയ്തിരുന്നു.
വിവാദമായതോടെ ആധവ് അർജുന പോസ്റ്റ് പിൻവലിച്ചെങ്കിലും പോലീസ് കേസെടുക്കുകയായിരുന്നു.
അതേസമയം കരൂര്‍ ദുരന്തവുമായി ബന്ധപ്പെട്ട് ആദ്യമായി പ്രതികരിച്ച് നടനും ടിവികെ അധ്യക്ഷനുമായ വിജയ്. ദുരന്തത്തിന്റെ ഉത്തരവാദിത്തം തന്റെ മേൽ മാത്രം ആരോപിച്ചാൽ മതിയെന്നും, പാർട്ടി പ്രവർത്തകരെ വേട്ടയാടരുത് എന്നും വിജയ് ആവശ്യപ്പെട്ടു. സി എം സാർ (സ്റ്റാലിൻ) എന്ന് പറഞ്ഞു കൊണ്ടാണ് വീഡിയോയിൽ അദ്ദേഹം ഇക്കാര്യങ്ങൾ പറഞ്ഞത്.
ജനങ്ങൾക്ക് എല്ലാം അറിയാമെന്നും സത്യം പുറത്തുവരുമെന്നും പങ്കുവെച്ച വീഡിയോയിലൂടെ വ്യക്തമാക്കി. കരൂരിൽ മാത്രം ദുരന്തമുണ്ടായത് എങ്ങനെ എന്ന സംശയം ഉന്നയിച്ച് ഒരു ഗൂഢാലോചനയുടെ സൂചന നൽകാനും വീഡിയോ സന്ദേശത്തിൽ അദ്ദേഹം മടിച്ചില്ല. തന്റെ വേദന മനസിലാക്കി ഒപ്പം നിന്നവര്‍ക്ക് നന്ദി എന്നും വിജയ് വിഡിയോ സന്ദേശത്തില്‍ പറയുന്നു.