ചെന്നൈ: തമിഴ്‌നാട്ടിലെ കരൂരിൽ 41 പേരുടെ മരണത്തിന് കാരണമായ ദുരന്തത്തിൽ മരിച്ചവരുടെ പോസ്റ്റ്‌മോർട്ടം റിപ്പോർട്ട് പുറത്തുവന്നു. ഞെട്ടിക്കുന്ന വിവരങ്ങളാണ് റിപ്പോർട്ടിൽ ഉള്ളത്. റിപ്പോർട്ട് പ്രകാരം, മരിച്ചവരിൽ 25 പേർ ശ്വാസം കിട്ടാതെയാണ് മരിച്ചത്. 10 പേർ വാരിയെല്ല് തകർന്നും മരണപ്പെട്ടു. മരിച്ചവരിൽ ഒൻപത് കുട്ടികൾ ഉണ്ടായിരുന്നു. ഇവർക്ക് വാരിയെല്ല് തകർന്നിട്ടാണ് ജീവൻ നഷ്ടമായത്.

കൂടാതെ, മരിച്ചവരിൽ പലരുടെയും ആന്തരിക അവയവങ്ങൾ തകർന്നിരുന്നു. മരണപ്പെട്ട പലർക്കും മൂന്ന് മിനിറ്റിലധികം സമയം ശ്വാസമെടുക്കാൻ കഴിഞ്ഞിരുന്നില്ല എന്നത് ദുരന്തത്തിന്റെ ഭീകരത സൂചിപ്പിക്കുന്നു. നിരവധി പേർ ആശുപത്രിയിലേക്ക് കൊണ്ടുപോകുന്ന വഴിക്ക് വെച്ച് തന്നെ മരിച്ചതായും റിപ്പോർട്ടിൽ വ്യക്തമാക്കുന്നു. മരിച്ച കുട്ടികളിൽ രണ്ടുപേരുടെ ശ്വാസകോശം ഉൾപ്പെടെയുള്ള ആന്തരിക അവയവങ്ങൾക്ക് ഗുരുതരമായ കേടുപാടുകൾ സംഭവിച്ചിരുന്നു.

അതേസമയം കരൂർ ദുരന്തത്തിനു പിന്നാലെ തമിഴക വെട്രി കഴകം പ്രാദേശിക നേതാവിനെ തൂങ്ങിമരിച്ച നിലയിൽ കണ്ടെത്തി. ടിവികെയുടെ വിഴുപ്പുറം ബ്രാഞ്ച് സെക്രട്ടറി വി. അയ്യപ്പൻ ആണ് ജീവനൊടുക്കിയത്. കരൂരിലെ തിക്കിലും തിരക്കിലും ആളുകൾ മരിച്ച വാർത്തകൾ കണ്ടതിന് ശേഷം അയ്യപ്പൻ വളരെ അസ്വസ്ഥനായിരുന്നു എന്ന് കുടുംബാംഗങ്ങൾ പറയുന്നു. സംഭവസ്ഥലത്തുനിന്ന് അയ്യപ്പൻ എഴുതിയതെന്നു കരുതുന്ന ഒരു കുറിപ്പ് പോലീസ് കണ്ടെടുത്തു. മുൻമന്ത്രിയും ഡിഎംകെ നേതാവുമായ സെന്തിൽ ബാലാജിക്കെതിരെ ഗുരുതര ആരോപണങ്ങളാണ് കത്തിൽ ഉന്നയിച്ചിരിക്കുന്നത്.

കരൂരിലെ ദുരന്തത്തിന് കാരണം മുൻമന്ത്രി സെന്തിൽ ബാലാജിയാണെന്നാണ് അയ്യപ്പൻ എഴുതിയ ആത്മഹത്യാക്കുറിപ്പിലെ പ്രധാന ആരോപണം.
സെന്തിൽ ബാലാജിയുടെ സമ്മർദ്ദം കാരണമാണ് കരൂരിലെ പരിപാടിക്ക് വേണ്ടത്ര സുരക്ഷാ ക്രമീകരണങ്ങൾ ഒരുക്കാതിരുന്നത് എന്നും കുറിപ്പിൽ പറയുന്നു.