ചെന്നൈ: കരൂർ ആൾക്കൂട്ട ദുരന്തത്തിനു പിന്നാലെ തമിഴക വെട്രി കഴകം (TVK) പ്രാദേശിക നേതാവിനെ തൂങ്ങിമരിച്ച നിലയിൽ കണ്ടെത്തി. ടിവികെയുടെ വിഴുപ്പുറം ബ്രാഞ്ച് സെക്രട്ടറി വി. അയ്യപ്പൻ ആണ് ജീവനൊടുക്കിയത്. സംഭവസ്ഥലത്തുനിന്ന് ഇദ്ദേഹം എഴുതിയതെന്നു കരുതുന്ന ഒരു കുറിപ്പ് പോലീസ് കണ്ടെടുത്തു. മുൻമന്ത്രിയും ഡിഎംകെ നേതാവുമായ സെന്തിൽ ബാലാജിക്കെതിരെ ഗുരുതര ആരോപണങ്ങളാണ് കത്തിൽ ഉന്നയിച്ചിരിക്കുന്നത്.

കരൂരിലെ ദുരന്തത്തിന് കാരണം മുൻമന്ത്രി സെന്തിൽ ബാലാജിയാണെന്നാണ് അയ്യപ്പൻ എഴുതിയ ആത്മഹത്യാക്കുറിപ്പിലെ പ്രധാന ആരോപണം.
സെന്തിൽ ബാലാജിയുടെ സമ്മർദ്ദം കാരണമാണ് കരൂരിലെ പരിപാടിക്ക് വേണ്ടത്ര സുരക്ഷാ ക്രമീകരണങ്ങൾ ഒരുക്കാതിരുന്നത് എന്നും കുറിപ്പിൽ പറയുന്നു. കൂലിപ്പണിക്കാരനായിരുന്ന അയ്യപ്പൻ, മുൻപ് വിജയ് ആരാധക കൂട്ടായ്മയുടെ ഭാരവാഹി ആയിരുന്നു. അദ്ദേഹം ടിവികെയുടെ റാലിയിൽ പങ്കെടുത്തിരുന്നു. കരൂരിലെ തിക്കിലും തിരക്കിലും ആളുകൾ മരിച്ച വാർത്തകൾ കണ്ടതിന് ശേഷം അയ്യപ്പൻ വളരെ അസ്വസ്ഥനായിരുന്നു എന്ന് കുടുംബാംഗങ്ങൾ പോലീസിന് മൊഴി നൽകി. സംഭവവുമായി ബന്ധപ്പെട്ട് പോലീസ് അയ്യപ്പൻ്റെ ഫോൺ കസ്റ്റഡിയിലെടുത്തിട്ടുണ്ട്.

അതേസമയം കരൂർ ദുരന്തവുമായി ബന്ധപ്പെട്ട് കൂടുതൽ ടിവികെ നേതാക്കളുടെ അറസ്റ്റ് ഇന്ന് ഉണ്ടാകാൻ സാധ്യതയുണ്ട്. കേസിൽ, ടിവികെ കരൂർ വെസ്റ്റ് ജില്ലാ സെക്രട്ടറി മതിയഴകനെ കഴിഞ്ഞ ദിവസം പോലീസ് അറസ്റ്റ് ചെയ്തിരുന്നു. ഇദ്ദേഹത്തിനെതിരെ മനഃപൂർവമല്ലാത്ത നരഹത്യ ഉൾപ്പെടെ അഞ്ച് വകുപ്പുകൾ പ്രകാരമാണ് കേസെടുത്തിരിക്കുന്നത്. ടിവികെ ജനറൽ സെക്രട്ടറി എൻ. ആനന്ദ്, ജോയിന്റ് ജനറൽ സെക്രട്ടറി നിർമൽ കുമാർ എന്നിവരെയും ഇന്ന് അറസ്റ്റ് ചെയ്തേക്കുമെന്നാണ് നിലവിലെ വിവരം.