കൊച്ചി: ഗൾഫിൽ ജോലി ചെയ്യുന്നതിനിടെ വായ്പയെടുത്ത് തിരിച്ചടയ്ക്കുന്നതിൽ വീഴ്ച വരുത്തിയ 13 മലയാളി നഴ്‌സുമാർക്കെതിരെ കുവൈറ്റിലെ ബാങ്ക് കേരളത്തിൽ കേസ് നൽകി. കുവൈറ്റിലെ അൽ അഹ്ലി ബാങ്കാണ് നഴ്സുമാർക്കെതിരെ കേസ് നൽകിയത്. നഴ്‌സുമാർ തിരിച്ചടയ്ക്കാനുള്ള വായ്പാ തുക 10.33 കോടി രൂപയാണെന്ന് അൽ അഹ്ലി ബാങ്കിന് വേണ്ടി ഹാജരായ ജെയിംസ് ആൻഡ് തോമസ് അസോസിയേറ്റ്സിലെ തോമസ് ജെ അനക്കല്ലുങ്കൽ വ്യക്തമാക്കി. ഇവർ ആദ്യം ചെറിയ തുക വായ്പയെടുത്ത് കൃത്യമായി തിരിച്ചടച്ചിരുന്നു. ഇതിലൂടെ ബാങ്കിന്റെ വിശ്വാസം നേടിയെടുത്ത ശേഷം വലിയ തുക വായ്പയെടുക്കുകയായിരുന്നുവെന്നും അദ്ദേഹം പറഞ്ഞു.

2019-നും 2021-നും ഇടയിൽ കുവൈറ്റ് ആരോഗ്യ മന്ത്രാലയത്തിന് കീഴിൽ ജോലി ചെയ്യുമ്പോഴാണ് ഈ 13 നഴ്സുമാർ ബാങ്കിൽ നിന്നും വായ്പയെടുത്തത്. തൊഴിൽ കരാർ അവസാനിച്ച ശേഷം ഇവർ കേരളത്തിലേക്ക് മടങ്ങിയെങ്കിലും പിന്നീട് കൂടുതൽ മെച്ചപ്പെട്ട തൊഴിലവസരങ്ങൾ തേടി യൂറോപ്പിലേക്കും മറ്റ് പാശ്ചാത്യ രാജ്യങ്ങളിലേക്കും കുടിയേറി. എന്നാൽ, ബാങ്കിൽ നിന്നും എടുത്ത വായ്പ തിരിച്ചടയ്ക്കാൻ ആരും തന്നെ തയ്യാറായില്ലെന്നും അൽ അഹ്ലി ബാങ്കിന്റെ പ്രതിനിധി പറയുന്നു. ബാങ്ക് കേരള സംസ്ഥാന പോലീസ് മേധാവിക്ക് നൽകിയ പരാതിയുടെ അടിസ്ഥാനത്തിൽ കോട്ടയം, എറണാകുളം ജില്ലകളിലാണ് ഇപ്പോൾ കേസുകൾ രജിസ്റ്റർ ചെയ്തിരിക്കുന്നത്.

വായ്പ തിരിച്ചടയ്‌ക്കാത്ത ഓരോ നഴ്സിനും 61 ലക്ഷം രൂപ മുതൽ 91 ലക്ഷം രൂപ വരെയാണ് കുടിശ്ശികയുള്ളതെന്നും ഇവർ ഇപ്പോൾ വിദേശത്ത് ഉയർന്ന ശമ്പളത്തിൽ ജോലി ചെയ്യുന്നുണ്ടെങ്കിലും വായ്പ തിരിച്ചടയ്ക്കാൻ തയ്യാറായിട്ടില്ലെന്നും ബാങ്ക് പ്രതിനിധി പറയുന്നു. കോട്ടയം ജില്ലയിൽ വായ്‌പാ തട്ടിപ്പുമായി ബന്ധപ്പെട്ട് എട്ട് കേസുകളാണ് രജിസ്റ്റർ ചെയ്തിട്ടുള്ളത്. കുറവിലങ്ങാട്, അയർക്കുന്നം, വെളളൂർ, കടുത്തുരുത്തി, വൈക്കം, തലയോലപ്പറമ്പ് എന്നീ പോലീസ് സ്റ്റേഷനുകളിലാണ് ഇത്. കൂടാതെ, എറണാകുളം ജില്ലയിൽ അഞ്ച് കേസുകൾ ഫയൽ ചെയ്തു. പുത്തൻകുരിശ്, പോത്താനിക്കാട്, വരാപ്പുഴ, അങ്കമാലി എന്നിവിടങ്ങളിലെ പോലീസ് സ്റ്റേഷനുകളാണ് ഈ കേസുകൾ കൈകാര്യം ചെയ്യുന്നത്. നേരത്തെ, മറ്റൊരു ധനകാര്യ സ്ഥാപനമായ ഗൾഫ് ബാങ്കിന്റെ പരാതിയെത്തുടർന്ന് 2024 ഡിസംബറിൽ 10 കേസുകൾ കേരള പോലീസ് രജിസ്റ്റർ ചെയ്തിരുന്നു.