ഇന്ത്യൻ സിനിമയിലെ പരമോന്നത ബഹുമതിയായ ദാദാ സാഹേബ് ഫാൽകെ പുരസ്‌കാരം നടൻ മോഹൻലാലിന് ഗംഭീര സ്വീകരണമൊരുക്കി 'ദൃശ്യം 3' സിനിമയുടെ അണിയറ പ്രവർത്തകർ. ചിത്രീകരണ സെറ്റിൽ വെച്ച് കേക്ക് മുറിച്ചായിരുന്നു മോഹൻലാലിന്റെ ഈ വലിയ നേട്ടം സഹപ്രവർത്തകർ ആഘോഷമാക്കിയത്.
'ദൃശ്യ'ത്തിൽ മോഹൻലാലിന്റെ നായികയായി എത്തിയ നടി മീനയാണ് ഈ ചിത്രങ്ങൾ തന്റെ ഇൻസ്റ്റ്ഗ്രാം അക്കൗണ്ടിലൂടെ ആരാധകരുമായി പങ്കുവെച്ചത്. ചിത്രങ്ങളിൽ മോഹൻലാലിനേയല്ല ജോർജുകുട്ടിയേയാണ് ആരാധകർക്ക് കാണാൻ സാധിക്കുന്നത്. തന്റെ ലുക്ക് പൂർണ്ണമായി ജോർജുകുട്ടിക്കായി താരം സമർപ്പിച്ചു കഴിഞ്ഞുവെന്ന് ഫോട്ടോകളിലൂടെ വ്യക്തമാണ്. ഒപ്പം അൻസിബ ഹസ്സൻ, എസ്തർ, ഇർഷാദ്, സംവിധായകൻ ജീത്തു ജോസഫ്, സിദ്ധു പനയ്ക്കൽ തുടങ്ങിയവരും ചിത്രത്തിലുണ്ട്.
ലാലേട്ടനെ തങ്ങളുടെ സഹനടൻ എന്ന് വിളിക്കുന്നത് ഒരു ബഹുമതിയാണെന്നാണ് ചിത്രം പങ്കുവെച്ചുകൊണ്ട് മീന കുറിച്ചത്. അദ്ദേഹത്തെ സുഹൃത്ത് എന്ന് വിളിക്കുന്നത് ഒരു അനുഗ്രഹമാണ്. അദ്ദേഹത്തിന്റെ സമർപ്പണവും വൈഭവവും ഓരോ വേഷത്തിലും തിളങ്ങുന്നു. സൗഹൃദത്തിന്റെയും സിനിമയുടെയും ഈ മനോഹരമായ യാത്രയിലെ മറ്റൊരു അധ്യായമാണ് ദൃശ്യം. ലാലേട്ടാ, നിങ്ങളെക്കുറിച്ച് എനിക്ക് അഭിമാനമുണ്ടെന്നും മീന കുറിച്ചു.
അതേസമയം, കഴിഞ്ഞ ദിവസമാണ് എറണാകുളം പൂത്തോട്ട എസ്.എൻ. ലോ കോളേജിൽ വെച്ച് ദൃശ്യം 3ന്റെ പൂജ നടന്നത്. 55 ദിവസങ്ങൾ കൊണ്ട് ചിത്രീകരണം പൂർത്തിയാക്കാനാണ് നിലവിൽ അണിയറ പ്രവർത്തകർ തീരുമാനിച്ചിരിക്കുന്നത്. ജോർജുകുട്ടി എന്ന കഥാപാത്രത്തിന് നാല് വർഷത്തിന് ശേഷം സംഭവിക്കുന്ന മാറ്റങ്ങളാണ് മൂന്നാം ഭാഗത്തിൽ പ്രധാനമായും ഉൾക്കൊള്ളിക്കുകയെന്ന് സംവിധായകൻ ജീത്തു ജോസഫ് വ്യക്തമാക്കിയിരുന്നു. ഇതൊരു 'ഹെവി ഇന്റലിജന്റ് സിനിമ' ആയിരിക്കില്ലെന്നും അദ്ദേഹം നേരത്തെ സൂചന നൽകിയിരുന്നു.