മുഖ്യമന്ത്രി പിണറായി വിജയൻ തികഞ്ഞ ഒരു ഭക്തനാണെന്ന് എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. ഇടതുപക്ഷത്ത് മുഖ്യമന്ത്രിയാകാൻ പിണറായി വിജയനു മാത്രമേ യോഗ്യതയുള്ളൂ എന്നും അടുത്ത തവണയും അദ്ദേഹം തന്നെ മുഖ്യമന്ത്രിയാകുമെന്നും വെള്ളാപ്പള്ളി കൂട്ടിച്ചേർത്തു. ആഗോള അയ്യപ്പ സംഗമത്തിന്റെ ഉദ്ഘാടന ചടങ്ങിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

നിരീശ്വരവാദ നിലപാടുകൾ പരസ്യമായി പ്രഖ്യാപിക്കുമെങ്കിലും, മുഖ്യമന്ത്രിയുൾപ്പെടെ ഭൂരിഭാഗം കമ്മ്യൂണിസ്റ്റുകാരും യഥാർത്ഥത്തിൽ ഭക്തരാണെന്ന് വെള്ളാപ്പള്ളി നടേശൻ അഭിപ്രായപ്പെട്ടു. പിണറായി വിജയൻ രണ്ടുതവണ ശബരിമല സന്ദർശിച്ചിട്ടുണ്ടെന്നും, ഭക്തനല്ലെങ്കിൽ അദ്ദേഹത്തിന് അവിടെ പോകാൻ സാധിക്കുമോ എന്നും ചോദിച്ച വെള്ളാപ്പള്ളി അവിടെ എത്തുന്ന അയ്യപ്പഭക്തരിൽ 90 ശതമാനവും കമ്മ്യൂണിസ്റ്റുകാരാണെന്നും ചൂണ്ടിക്കാട്ടി.

മുൻപ് താനും മുഖ്യമന്ത്രി പിണറായി വിജയനും പരസ്പരം താങ്ങായി നിന്നിട്ടുണ്ട്. മുഖ്യമന്ത്രിയാകാൻ യോഗ്യതയുള്ളവർ വേറെയുണ്ടാകാം, പക്ഷേ നയിക്കാനുള്ള കഴിവ് പിണറായിക്ക് മാത്രമേയുള്ളൂ എന്നും അദ്ദേഹം കൂട്ടിച്ചേർത്തു.ഇതോടൊപ്പം, യു.ഡി.എഫിൽ തമ്മിലടിയാണെന്നും അവർ അപ്രസക്തമായിക്കൊണ്ടിരിക്കുകയാണെന്നും വെള്ളാപ്പള്ളി അഭിപ്രായപ്പെട്ടു.