തിരുവനന്തപുരം: ആഭ്യന്തരവകുപ്പിൽ നിന്നു 144 പോലീസ് ഉദ്യോഗസ്ഥരെ പിരിച്ചു വിട്ടുവെന്ന മുഖ്യമന്ത്രിയുടെ പ്രസ്താവന തെറ്റാണെന്ന് കോൺഗ്രസ് വർ‍ക്കിങ് കമ്മിറ്റി അംഗം രമേശ് ചെന്നിത്തല ആരോപിച്ചു. ബോധപൂർവം നുണ പറഞ്ഞ് സഭയേയും ജനങ്ങളേയും തെറ്റിദ്ധരിപ്പിച്ചുവെന്ന് ചെന്നിത്തല ആരോപിച്ചു. നിയമസഭയിൽ തെറ്റായ വിവരം നൽകിയതിന് മുഖ്യമന്ത്രിക്കെതിരെ സ്പീക്കറിന് അവകാശലംഘന നോട്ടീസ് നൽകുമെന്നും അദ്ദേഹം പറഞ്ഞു.

നാഷണൽ ക്രൈം റെക്കോർഡ്സ് ബ്യൂറോ (NCRB) പ്രകാരം, 2016 മുതൽ ഇതുവരെ 50-ൽ താഴെ ഉദ്യോഗസ്ഥരെയാണ് പിരിച്ചു വിട്ടിട്ടുള്ളത്. എന്നാൽ മുഖ്യമന്ത്രി സഭയിൽ പറഞ്ഞത് 144 പേരെ പിരിച്ചു വിട്ടുവെന്നായിരുന്നു. “ഈ ലിസ്റ്റ് സഭയിൽ വെയ്ക്കണം, ഇല്ലെങ്കിൽ പ്രസ്താവന പിൻവലിച്ച് മാപ്പ് പറയണം” എന്ന് ചെന്നിത്തല വെല്ലുവിളിച്ചു.ഉമ്മൻചാണ്ടി സർക്കാരിന്റെ കാലത്ത് (2011–2016) 61 പേരെയാണ് അച്ചടക്ക നടപടിയുടെ ഭാഗമായി പിരിച്ചു വിട്ടിരുന്നത്. എന്നാൽ പിണറായി സർക്കാരിന്റെ ഒമ്പതര വർഷങ്ങളിൽ കടുത്ത ക്രിമിനൽ പശ്ചാത്തലമുള്ളവരെ സംരക്ഷിക്കുകയും, നല്ല ഉദ്യോഗസ്ഥരെ അവഗണിച്ച് കളങ്കിതരായവരെ പ്രധാനസ്ഥാനങ്ങളിൽ നിയമിക്കുകയും ചെയ്തുവെന്നായിരുന്നു ചെന്നിത്തലയുടെ ആരോപണം.

ഉദയകുമാർ ഉരുട്ടിക്കൊലക്കേസിൽ പ്രതികൾ രക്ഷപ്പെട്ടത് ഉമ്മൻചാണ്ടി സർക്കാരിന്റെ അനാസ്ഥ മൂലമെന്ന മുഖ്യമന്ത്രിയുടെ ആരോപണം സത്യവിരുദ്ധമാണെന്നും, കേസ് അന്വേഷിച്ചത് സിബിഐ ആയിരുന്നുവെന്നും ചെന്നിത്തല പറഞ്ഞു. മുത്തങ്ങ വെടിവെയ്പ്പിനെയും മുഖ്യമന്ത്രി തെറ്റിദ്ധരിപ്പിച്ചുവെന്ന് അദ്ദേഹം ആരോപിച്ചു.സത്യസന്ധനായ എ.കെ. ആന്റണിക്കെതിരെ മുഖ്യമന്ത്രിയുടെ ആരോപണങ്ങൾ മുഴുവൻ അടിസ്ഥാനരഹിതമാണെന്നും ചെന്നിത്തല പറഞ്ഞു.