തിരുവനന്തപുരം: കുഞ്ഞുങ്ങളെ സംരക്ഷിക്കുകയാണഅ അല്ലാതെ ഇല്ലാതാക്കുകയല്ല ‌എൽഡിഎഫ് സർക്കാർ ചെയ്യുന്നതെന്ന് ആരോഗ്യ മന്ത്രി വീണാ ജോർജ് പറഞ്ഞു. ശിശു ജനന-മരണ നിരക്കുമായി ബന്ധപ്പെട്ട് നിയമസഭയിൽ ചോദ്യത്തിന് മറുപടി നൽകവേയാണ് മന്ത്രിയുടെ പരാമർശം. പാലക്കാട് എംഎൽഎ രാഹുൽ മാങ്കൂട്ടത്തിനെതിരെ നിർബന്ധിത ഗർഭഛിദ്രവുമായി ബന്ധപ്പെട്ട് അന്വേഷണം നടക്കുന്ന സാഹചര്യത്തിലാണ് മന്ത്രിയുടെ ഈ പ്രസ്താവന. ഇതോടെ ഈ വാക്കുകൾ ഇപ്പോൾ സോഷ്യൽ മീഡിയയിൽ ആഘോഷമാക്കുകയാണ്.

കേരളത്തിലെ ശിശുമരണനിരക്ക് അഞ്ചു ശതമാനമായി കുറക്കാൻ സാധിച്ചു. ഇത് അമേരിക്കൻ ഐക്യനാടുകളിലെ നിരക്കിനേക്കാൾ കുറവാണെന്നും മന്ത്രി പറഞ്ഞു. ഗർഭസ്ഥശിശുക്കൾക്ക് വരെ വിദഗ്ധ ചികിത്സ ഉറപ്പാക്കുന്ന നൂതന പദ്ധതികൾ ഉൾപ്പെടെ, ശിശുക്കളുടെ സംരക്ഷണത്തിനായി സർക്കാർ നടപ്പാക്കുന്ന സമഗ്രമായ പദ്ധതികളുടെ വിജയമാണ് ഈ നേട്ടത്തിന് പിന്നിലെന്നും വീണാ ജോർജ്. രാഹുലിന്റെ പേരെടുത്തു പറയാതെയായിരുന്നു ആരോ​ഗ്യമന്ത്രിയുടെ പരാമർശമെങ്കിലും രാ​ഹുലിനെ കടന്നാക്രമിക്കുന്ന തരത്തിലായിരുന്നു മന്ത്രി കെടി ജലീൽ രാഹുലിനെതിരെ പ്രതികരിച്ചത്.

പോലീസ് അതിക്രമങ്ങളെക്കുറിച്ചുള്ള അടിയന്തര പ്രമേയ ചർച്ചയിൽ കെ.ടി. ജലീൽ രാഹുൽ മാങ്കൂട്ടത്തിലിനെയും പി.കെ. ഫിറോസിനെയും പേരെടുത്ത് വിമർശിച്ചു. എല്ലാ കോൺഗ്രസുകാരും ലീഗുകാരും രാഹുലിനെയും ഫിറോസിനെയും പോലെയല്ലെന്ന് ജലീൽ പറഞ്ഞു. ഭ്രൂണത്തിൽവെച്ച് കുഞ്ഞിനെ കൊന്നുകളഞ്ഞുവെന്ന ആരോപണം നേരിടുന്ന രാഹുൽ മാങ്കൂട്ടത്തിനെപ്പോലെയല്ല എല്ലാ യൂത്ത് കോൺഗ്രസ് നേതാക്കളുമെന്നും പ്രവർത്തകരുമെന്നും അദ്ദേഹം കൂട്ടിച്ചേർത്തു.

അതേസമയം, പ്രതിപക്ഷ നേതാവ് വി.ഡി. സതീശൻ്റെ എതിർപ്പ് വകവെക്കാതെ രാഹുൽ മാങ്കൂട്ടത്തിൽ കഴിഞ്ഞ ദിവസം നിയമസഭയിലെത്തി. യുവനേതാവ് നേമം ഷെജീറിനൊപ്പം പ്രത്യേക വാഹനത്തിലാണ് രാഹുൽ എത്തിയത്. സഭയിലെത്തിയ ശേഷം ഒരു കുറിപ്പ് ലഭിച്ചതിനെ തുടർന്ന് രാഹുൽ സഭയിൽ നിന്ന് പുറത്തേക്ക് പോവുകയും ചെയ്തു.