തിരുവനന്തപുരം: വഖഫ് നിയമഭേദഗതി ഭരണഘടനാവിരുദ്ധമെന്ന കോൺഗ്രസ് വാദം സുപ്രീം കോടതി വിധിയോടെ തകർന്നതായി ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. മുനമ്പം ജനത ഉൾപ്പെടെ ആയിരക്കണക്കിന് ആളുകൾ നേരിടുന്ന വഖഫ് ഭൂമി കയ്യേറ്റ പ്രശ്നങ്ങൾക്ക് പരിഹാരം കാണാനാണ് കേന്ദ്ര സർക്കാർ ഈ നിയമഭേദഗതി കൊണ്ടുവന്നതെന്നും അദ്ദേഹം കൂട്ടിച്ചേർത്തു.

വഖഫ് നിയമഭേദഗതി ഭരണഘടനാവിരുദ്ധമാണെന്ന് വരുത്തിത്തീർക്കാൻ കോൺഗ്രസ് ഉൾപ്പെടെയുള്ള 'ഇൻഡി' മുന്നണിയിലെ പാർട്ടികൾ നടത്തിയ ശ്രമങ്ങൾക്കുള്ള തിരിച്ചടിയാണ് സുപ്രീം കോടതിയുടെ നടപടികൾ. മുനമ്പത്തെ പ്രശ്നം പരിഹരിക്കാൻ ആവശ്യമായ നിയമഭേദഗതിയിലെ, സെക്ഷൻ 40 നീക്കം ചെയ്യുകയും സെക്ഷൻ 2 കൂട്ടിച്ചേർക്കുകയും ചെയ്ത നടപടികളിൽ സുപ്രീം കോടതി ഇടപെടാൻ തയ്യാറായില്ലെന്നത് ശ്രദ്ധേയമാണെന്ന് അദ്ദേഹം പറഞ്ഞു. ഇതോടെ മുനമ്പം ജനതയ്ക്ക് ബിജെപി നൽകിയ വാക്ക് യാഥാർത്ഥ്യമാകുകയാണെന്നും രാജീവ് ചന്ദ്രശേഖർ വ്യക്തമാക്കി.

വഖഫ് ബോർഡിലും കൗൺസിലിലും മറ്റു മതവിശ്വാസികൾ ഉണ്ടാകാൻ പാടില്ലെന്ന കോൺഗ്രസ്, മുസ്‌ലിം ലീഗ്, സി.പി.എം. തുടങ്ങിയ പാർട്ടികളുടെ ആവശ്യത്തിനെതിരെയാണ് സുപ്രീം കോടതി നിലപാട് സ്വീകരിച്ചത്. അതുകൊണ്ടുതന്നെ കോടതിയുടെ ഈ ഉത്തരവ് സ്വാഗതാർഹമാണെന്ന് ബിജെപി സംസ്ഥാന അധ്യക്ഷൻ അഭിപ്രായപ്പെട്ടു.

വഖഫ് കയ്യേറ്റം കാരണം ഭീഷണി നേരിടുന്നവർക്കും യഥാർത്ഥ വഖഫ് ഭൂമിക്കും ഒരുപോലെ ഗുണം ചെയ്യുന്നതാണ് ഈ നിയമഭേദഗതിയും സുപ്രീം കോടതിയുടെ ഇടപെടലും. എന്നാൽ, പ്രീണന രാഷ്ട്രീയത്തിന്റെ പേരിൽ പ്രതിപക്ഷ പാർട്ടികൾ ഇതിനെ എതിർക്കുകയാണ്. സുപ്രീം കോടതിയിൽ നിന്ന് തിരിച്ചടി ലഭിച്ച ഈ സാഹചര്യത്തിലെങ്കിലും മുനമ്പം ജനതയെപ്പോലെ സ്വന്തം മണ്ണിനുവേണ്ടി പോരാടുന്നവർക്കൊപ്പം നിന്ന് നിയമഭേദഗതിയെ അംഗീകരിക്കാൻ പ്രതിപക്ഷ പാർട്ടികൾ തയ്യാറാവണമെന്നും രാജീവ് ചന്ദ്രശേഖർ പ്രസ്താവനയിൽ ആവശ്യപ്പെട്ടു.