പാലക്കാട്: മന്ത്രവാദ ക്രിയകൾക്കിടെ പുഴയിലിറങ്ങിയ യുവാവും മന്ത്രവാദിയും മുങ്ങിമരിച്ചു. പാലക്കാട് കൊഴിഞ്ഞാമ്പാറ സ്വദേശി ഹസൻ മുഹമ്മദ് (48), കോയമ്പത്തൂർ സ്വദേശി യുവരാജ് (18) എന്നിവരാണ് മരിച്ചത്. കൊഴിഞ്ഞാമ്പാറയിലെ കുലുക്കപ്പാറ പുഴയിലാണ് അപകടം ഉണ്ടായത്.

ഹസൻ മുഹമ്മദിന്റെ വീട്ടിൽ നടന്ന മന്ത്രവാദ ചടങ്ങുകൾക്ക് ശേഷം, ചില പ്രത്യേക ക്രിയകൾ ചെയ്യുന്നതിനായി ഇരുവരും പുഴയിലിറങ്ങുകയായിരുന്നു. പുഴയിൽ ഇറങ്ങിയതിന് പിന്നാലെ ഇവർ അപകടത്തിൽ പെട്ടെന്നാണ് റിപ്പോർട്ടുകൾ.

കൊഴിഞ്ഞാമ്പാറ പള്ളിത്തെരുവിൽ താമസിക്കുന്ന ഹസൻ മുഹമ്മദിന്റെ വീട്ടിലാണ് ദുർമന്ത്രവാദ ക്രിയകൾ നടന്നത്. ജോലിക്കായി ബുദ്ധിമുട്ടുന്ന മകന് പരിഹാരം തേടിയാണ് യുവരാജും അമ്മയും സഹോദരി ഭർത്താവും ഉൾപ്പെടെയുള്ള കുടുംബം കോയമ്പത്തൂരിൽ നിന്ന് ഹസനെ കാണാനെത്തിയത്. കഴിഞ്ഞ ശനിയാഴ്ച ഇവർ ഹസന്റെ അടുത്തെത്തിയിരുന്നെങ്കിലും ഒരാഴ്ച കഴിഞ്ഞ് വീണ്ടും വരാൻ ഹസൻ ആവശ്യപ്പെടുകയായിരുന്നു.