കൊച്ചി: സൈബർ ആക്രമണങ്ങൾക്കും അപകീർത്തികരമായ പരാമർശങ്ങൾക്കുമെതിരെ നടി റിനി ആൻ ജോർജ് മുഖ്യമന്ത്രിക്ക് പരാതി നൽകി. സമൂഹമാധ്യമങ്ങളിലെ മോശം പരാമർശങ്ങൾക്കെതിരെ കേസെടുക്കണമെന്നാണ് നടിയുടെ ആവശ്യം.

രാഹുൽ ഈശ്വർ അടക്കമുള്ളവർക്കെതിരെയാണ് റിനി പരാതി നൽകിയിരിക്കുന്നത്. ഇതിന് തെളിവായി വിവിധ ഓൺലൈൻ ചാനലുകളുടെ ലിങ്കുകളും പരാതിക്കൊപ്പം സമർപ്പിച്ചിട്ടുണ്ട്. മുഖ്യമന്ത്രിക്ക് പുറമെ എറണാകുളം റൂറൽ എസ്.പി, മുനമ്പം ഡിവൈഎസ്പി എന്നിവർക്കും നടി പരാതി നൽകിയിട്ടുണ്ട്.

ഒരു യുവ നേതാവിൽ നിന്ന് മോശം അനുഭവം ഉണ്ടായെന്ന് റിനി ആൻ ജോർജ് നേരത്തെ വെളിപ്പെടുത്തിയിരുന്നു. ഇതിന് പിന്നാലെയാണ് നടിക്കെതിരെ വലിയ സൈബർ ആക്രമണം ഉണ്ടായത്. യുവനേതാവിനെതിരായ ആരോപണങ്ങളിൽ നിയമപരമായ നടപടികളുമായി മുന്നോട്ട് പോകുന്നില്ലെന്ന് റിനി മുൻപ് വ്യക്തമാക്കിയിരുന്നു. സാധാരണക്കാരായ സ്ത്രീകൾ സമൂഹത്തിൽ നേരിടേണ്ടിവരുന്ന പ്രശ്നങ്ങൾ ഉയർത്തിക്കാട്ടുക മാത്രമാണ് തന്റെ ലക്ഷ്യമെന്നും നടി പറഞ്ഞിരുന്നു.