പാലക്കാട് നടന്ന വ്യവസായ സ്മാർട്ട് സിറ്റി കോൺക്ലേവിൽ ആളില്ലാത്തതിൽ മുഖ്യമന്ത്രി പിണറായി വിജയൻ അതൃപ്തി രേഖപ്പെടുത്തി. പരിപാടിയുടെ ഗൗരവം സംഘാടകർ ഉൾക്കൊണ്ടില്ലെന്ന് അദ്ദേഹം കുറ്റപ്പെടുത്തി.

“കാണുമ്പോൾ കുറച്ചധികം കാര്യങ്ങൾ പറയാനുണ്ട്, പക്ഷേ ഇപ്പോൾ ഒന്നും പറയുന്നില്ല. ഇങ്ങനെയാണോ ഒരു പരിപാടി നടത്തേണ്ടത്?” എന്ന് ചോദിച്ചുകൊണ്ടാണ് മുഖ്യമന്ത്രി വിമർശനം ഉന്നയിച്ചത്.

സർക്കാർ ചെയ്യുന്ന നല്ല കാര്യങ്ങൾ ജനങ്ങൾ അറിയാതിരിക്കാൻ മാധ്യമങ്ങൾ ശ്രമിക്കുന്നുണ്ടെന്ന് അദ്ദേഹം ആരോപിച്ചു. വ്യവസായ മേഖലയിലെ നേട്ടങ്ങൾ എണ്ണിപ്പറഞ്ഞുകൊണ്ടാണ് മുഖ്യമന്ത്രി മാധ്യമങ്ങളെ വിമർശിച്ചത്.

ഏത് സർക്കാർ ഭരിച്ചാലും നടക്കുമെന്ന് ചിലർ പറയുന്ന കാര്യങ്ങൾ ഈ സർക്കാർ നടപ്പിലാക്കിയെന്നും, അസാധ്യമെന്ന് കരുതിയ പലതും യാഥാർത്ഥ്യമാക്കിയെന്നും അദ്ദേഹം കൂട്ടിച്ചേർത്തു. കഞ്ചിക്കോട് ഇൻഡസ്ട്രീസ് ഫോറത്തിന്റെ നേതൃത്വത്തിൽ പാലക്കാട് പുതുശ്ശേരിയിലാണ് പരിപാടി സംഘടിപ്പിച്ചത്.