വി.ഡി. സതീശൻ മുഖ്യമന്ത്രിയാകാനുള്ള ഒരുക്കത്തിലാണ് എന്ന് എസ്.എൻ.ഡി.പി. ജനറൽ സെക്രട്ടറി വെള്ളാപ്പള്ളി നടേശൻ ആലപ്പുഴയിൽ പറഞ്ഞു. കൂടാതെ, മുസ്‌ലിം ലീഗും കേരള കോൺഗ്രസും ഒപ്പമുള്ളിടത്തോളം കാലം യു.ഡി.എഫിന് ഒരു കാര്യത്തിലും ഉറച്ച നിലപാട് എടുക്കാൻ കഴിയില്ലെന്നും, യു.ഡി.എഫിനെ നയിക്കുന്നത് ആരാണെന്ന് എല്ലാവർക്കും അറിയാമെന്നും അദ്ദേഹം വിമർശിച്ചു.
അതേസമയം ആഗോള അയ്യപ്പ സംഗമം ഒരു വലിയ അത്ഭുതമായി മാറുമെന്നും അദ്ദേഹം അഭിപ്രായപ്പെട്ടു. അയ്യപ്പൻ്റെ സ്വാധീനം രാജ്യമെമ്പാടും ശക്തമാണ്. രാജ്യത്തിനകത്തും പുറത്തുമുള്ള ആളുകളെ ഒരുമിപ്പിക്കുന്ന ഈ സംഗമം ശബരിമലയുടെ പ്രാധാന്യം ലോകത്തിൻ്റെ നെറുകയിൽ എത്തിക്കുമെന്നും അദ്ദേഹം കൂട്ടിച്ചേർത്തു.
ശബരിമലയുടെ വികസനം സംസ്ഥാനത്തിനും രാജ്യത്തിനും സാമ്പത്തികമായി വലിയ നേട്ടങ്ങൾ ഉണ്ടാക്കുമെന്നും, ഇതിനോട് സഹകരിക്കാത്തവർ പിന്നീട് ചരിത്രത്തിൽ പരിഹാസ്യരായി മാറുമെന്നും വെള്ളാപ്പള്ളി പറഞ്ഞു. ശബരിമലയിലെ സ്ത്രീ പ്രവേശനവുമായി തിരഞ്ഞെടുപ്പിന് ബന്ധമില്ലെന്ന് പറഞ്ഞ അദ്ദേഹം, സ്ത്രീ പ്രവേശന വിവാദത്തിന് ശേഷവും പിണറായി സർക്കാർ വീണ്ടും അധികാരത്തിൽ വന്നത് ഇതിന് ഉദാഹരണമായി ചൂണ്ടിക്കാട്ടി. ശബരിമല സ്ത്രീ പ്രവേശനവുമായി ബന്ധപ്പെട്ട് എടുത്ത കേസുകൾ പിൻവലിക്കണമെന്നും, കേസുകളുടെ മെറിറ്റ് പരിഗണിച്ച് അവ പിൻവലിച്ചാൽ മതിയെന്നും അദ്ദേഹം ആവശ്യപ്പെട്ടു.