കൊച്ചി: വെള്ളാപ്പള്ളി നടേശൻ പ്രതിയായ മൈക്രോഫിനാൻസ് തട്ടിപ്പ് കേസിൽ അന്വേഷണ ഉദ്യോഗസ്ഥനെ മാറ്റാൻ സർക്കാർ നീക്കം. കേസ് അന്വേഷിക്കുന്ന എസ്.പി എസ്. ശശിധരനെ മാറ്റാനാണ് സർക്കാർ ശ്രമിക്കുന്നത്. ഈ കേസിൽ ശശിധരൻ തന്നെ അന്വേഷണം തുടരുമെന്ന് ഹൈക്കോടതിക്ക് നേരത്തെ നൽകിയ ഉറപ്പിൽ നിന്ന് സർക്കാർ പിന്നോട്ട് പോകുകയാണ്.
വിജിലൻസിൽ നിന്ന് സ്ഥലം മാറിപ്പോയാലും മൈക്രോഫിനാൻസ് കേസ് ശശിധരൻ തന്നെ അന്വേഷിക്കുമെന്ന് സർക്കാർ ഹൈക്കോടതിയിൽ ഉറപ്പുനൽകിയിരുന്നു. ഈ ഉറപ്പ് പ്രകാരം ഉത്തരവിറക്കാൻ ഹൈക്കോടതി നിർദേശിക്കുകയും ചെയ്തു. എന്നാൽ ഇപ്പോൾ കേസിലെ അന്വേഷണ ഉദ്യോഗസ്ഥനെ മാറ്റാൻ അനുവദിക്കണമെന്നാവശ്യപ്പെട്ട് ആഭ്യന്തര സെക്രട്ടറി നേരിട്ട് ഹൈക്കോടതിയെ സമീപിച്ചിരിക്കുകയാണ്.
നിലവിൽ എസ്.പി റാങ്കിലുള്ള ഉദ്യോഗസ്ഥൻ അന്വേഷിക്കുന്ന കേസ് ഡി.ഐ.ജി തലത്തിലുള്ള ഉദ്യോഗസ്ഥനെ ഏൽപ്പിക്കാമെന്നാണ് ആഭ്യന്തര സെക്രട്ടറി കോടതിയെ അറിയിച്ചത്. ഡി.ഐ.ജി കെ. കാർത്തിക്കിന് അന്വേഷണ ചുമതല നൽകുന്നതിലൂടെ സംസ്ഥാനതലത്തിൽ കൂടുതൽ വിശദമായ അന്വേഷണം നടത്താൻ സാധിക്കുമെന്നും സർക്കാർ വാദിക്കുന്നു.
സർക്കാർ ഫണ്ടുകൾ ദുരുപയോഗം ചെയ്തതുമായി ബന്ധപ്പെട്ടാണ് വിജിലൻസ് ഈ കേസ് അന്വേഷിക്കുന്നത്. ഒക്ടോബറിനുള്ളിൽ കേസിന്റെ കുറ്റപത്രം സമർപ്പിക്കണമെന്ന് ഹൈക്കോടതി സമയപരിധി നിശ്ചയിച്ചിരുന്നു. ഇതിനിടയിലാണ് പുതിയ അന്വേഷണ ഉദ്യോഗസ്ഥനെ നിയമിക്കാനുള്ള സർക്കാർ നീക്കം. പുതിയ ഉദ്യോഗസ്ഥൻ വരുമ്പോൾ അന്വേഷണം വൈകാൻ സാധ്യതയുണ്ടെന്ന ആശങ്ക നിലനിൽക്കുന്നുണ്ട്.