ബിഹാറിലെ ആർജെഡി-കോൺഗ്രസ് പരിപാടിയിൽ വെച്ച് അന്തരിച്ച തന്റെ അമ്മയ്ക്കെതിരെ നടത്തിയ പരാമർശങ്ങളിൽ വികാരാധീനനായി പ്രധാനമന്ത്രി നരേന്ദ്ര മോദി. രാഹുൽ ഗാന്ധിയുടെ 'വോട്ട് അധികാർ യാത്ര'യ്ക്കിടെ ദർഭംഗയിൽ നടന്ന കോൺഗ്രസ്-ആർജെഡി റാലിയിലാണ് പ്രധാനമന്ത്രി മോദിയുടെ അമ്മയെ ലക്ഷ്യമിട്ട് അധിക്ഷേപകരമായ മുദ്രാവാക്യങ്ങൾ മുഴങ്ങിയത്.
"അമ്മയാണ് നമ്മുടെ ലോകം. അമ്മയാണ് നമ്മുടെ ആത്മാഭിമാനം. പാരമ്പര്യത്താൽ സമ്പന്നമായ ഈ ബീഹാറിൽ കുറച്ച് ദിവസങ്ങൾക്ക് മുമ്പ് സംഭവിച്ചത് ഞാൻ സങ്കൽപ്പിച്ചിട്ടുപോലുമില്ല. ബീഹാറിലെ ആർജെഡി-കോൺഗ്രസ് വേദിയിൽ വെച്ച് എന്റെ അമ്മയെ അപമാനിച്ചു," പ്രധാനമന്ത്രി മോദി പറഞ്ഞു.
രാഹുൽ ഗാന്ധിയുടെ 'വോട്ട് അധികാർ യാത്ര'യ്ക്കിടെ ബിഹാറിലെ ദർഭംഗയിൽ നടന്ന കോൺഗ്രസ്-ആർജെഡി പരിപാടിയിലാണ് പ്രധാനമന്ത്രി നരേന്ദ്ര മോദിയുടെ അമ്മയെ അപമാനിച്ച് മുദ്രാവാക്യങ്ങൾ മുഴക്കിയാതായി ആരോപണം ഉയരുന്നത്.
സ്ത്രീകളുടെ സംരംഭകത്വവും സ്വാശ്രയത്വവും പ്രോത്സാഹിപ്പിക്കുന്നതിന് ലക്ഷ്യമിട്ടുള്ള ഒരു പുതിയ സഹകരണ സംരംഭം ബിഹാറിൽ ഉദ്ഘാടനം ചെയ്തുകൊണ്ട് സംസാരിക്കുന്നതിനിടെയാണ് അദ്ദേഹം ഇതേക്കുറിച്ച് പരാമർശിച്ചത്.
സ്വയം സഹായ സംഘങ്ങളുമായി (എസ്എച്ച്ജി) ബന്ധപ്പെട്ട് പ്രവർത്തിക്കുന്ന ഗ്രാമീണ വനിതകളുടെ സംരംഭകത്വ കഴിവുകൾ വർദ്ധിപ്പിക്കുന്നതിനാണ് ഈ പരിപാടി രൂപകൽപ്പന ചെയ്തിരിക്കുന്നതെന്ന് മോദി പറഞ്ഞു.