തിരുവനന്തപുരം: ആരോപണ വിധേയനായ രാഹുൽ മാങ്കൂട്ടത്തിലിനെ (Rahul Mamkoottathil) ഉന്നത കോൺ​ഗ്രസ് നേതാക്കളെല്ലാം കൈവിട്ട സ്ഥിതിയാണ്. ഇപ്പോഴിതാ പ്രതിപക്ഷ നേതാവ് വി.ഡി. സതീശനു പിന്നാലെ രാഹുൽ മാങ്കൂട്ടത്തിലിനെ തള്ളിപ്പറഞ്ഞ് കോൺഗ്രസ് നേതാവ് രമേശ് ചെന്നിത്തല (Ramesh Chennithala)യും രംഗത്ത്. രാഹുൽ മാങ്കൂട്ടത്തിൽ എം.എൽ.എ. സ്ഥാനം രാജി വയ്ക്കണമെന്ന് രമേശ് ചെന്നിത്തല എ.ഐ.സി.സി. നേതൃത്വത്തെയും കെ.പി.സി.സി. അധ്യക്ഷൻ സണ്ണി ജോസഫിനെയും അറിയിച്ചുവെന്നാണ് റിപ്പോർട്ട്.

വി.ഡി. സതീശൻ ഉൾപ്പെടെയുള്ളവരുമായി ഇക്കാര്യം ചർച്ച ചെയ്തിട്ടുണ്ടെന്നും സൂചനയുണ്ട്. രാഹുലിനെതിരെ ഇനിയും പരാതികൾ വരാൻ സാധ്യതയുണ്ടെന്നും ഒരു നിമിഷം പോലും എം.എൽ.എ. സ്ഥാനത്ത് തുടരരുതെന്നും എത്രയും വേഗം രാജി വയ്പ്പിക്കണമെന്നുമാണ് ചെന്നിത്തല നേതൃത്വത്തോട് ആവശ്യപ്പെട്ടത്.

രാജിവയ്ക്കാത്ത പക്ഷം, വരാനിരിക്കുന്ന തിരഞ്ഞെടുപ്പുകളെ അത് പ്രതികൂലമായി ബാധിക്കുമെന്നും പരാതി മാത്രമാണെന്ന് പറഞ്ഞ് രാജിയിൽ നിന്ന് ഒഴിഞ്ഞുമാറിയാൽ അത് പാർട്ടിക്ക് വലിയ ക്ഷീണമുണ്ടാക്കുമെന്നും അദ്ദേഹം ചൂണ്ടിക്കാട്ടി. സണ്ണി ജോസഫുമായി ചെന്നിത്തല ആശയവിനിമയം നടത്തിയിട്ടുണ്ട്.

രാഹുലിനെതിരെ ആരോപണങ്ങൾ ഉയർന്നപ്പോൾ തന്നെ ശക്തമായ നിലപാടെടുത്ത നേതാവാണ് രമേശ് ചെന്നിത്തല. നേരത്തെയും രാഹുലിനെതിരെ നടപടി വൈകരുതെന്ന് അദ്ദേഹം നേതൃത്വത്തോട് ആവശ്യപ്പെട്ടിരുന്നു. ഒന്നുകിൽ രാജി, അല്ലെങ്കിൽ പുറത്താക്കുക എന്നതായിരുന്നു ചെന്നിത്തലയുടെ നിലപാട്. ഇതോടെ കോൺഗ്രസിലെ പ്രമുഖരായ രണ്ട് നേതാക്കളും രാഹുലിനെതിരായി രംഗത്തെത്തിയിരിക്കുകയാണ്. നിലവിൽ ഷാഫി പറമ്പിൽ ഒഴികെ മറ്റെല്ലാ നേതാക്കളും രാഹുലിനെ കൈവിട്ട നിലയിലാണ്.