കൊച്ചി: സിനിമാതാരങ്ങളുടെ സംഘടനയായ 'അമ്മ'യുടെ പ്രസി‍ഡന്റായി നടി ശ്വേതാ മേനോൻ തിരഞ്ഞെടുക്കപ്പെട്ടു. ചരിത്രത്തിലാദ്യമായാണ് അമ്മ സംഘടനയുടെ തലപ്പത്തേക്ക്‌ ഒരു വനിത തിരഞ്ഞെടുക്കപ്പെടുന്നത്. തിരഞ്ഞെടുപ്പിൽ എതിർ സ്ഥാനാർത്ഥിയായിരുന്ന ദേവനെ പരാജയപ്പെടുത്തിയാണ് ശ്വേതാ മേനോൻ അമ്മയെ നയിക്കാൻ ഒരുങ്ങുന്നത്.

ജനറൽ സെക്രട്ടറിയായി തിരഞ്ഞെടുക്കപ്പെട്ടത് കുക്കൂ പരമേശ്വരൻ ആണ്. അമ്മയുടെ പ്രധാനപ്പെട്ട സ്ഥാനങ്ങൾ ആദ്യമായി വനിതകൾക്ക് ലഭിച്ചു എന്ന പ്രത്യേകതയും ഈ തിരഞ്ഞെടുപ്പിനുണ്ട്. പുതിയ ഭരണസമിതിയിൽ പ്രസിഡന്റ് ഉൾപ്പെടെ 17 അംഗങ്ങളിൽ എട്ടുപേരും വനിതകളാണ്. 248 വനിതാ അംഗങ്ങൾ ഉൾപ്പെടെ സംഘടനയിലെ 54 അംഗങ്ങളിൽ 298 പേരാണ് വോട്ട് രേഖപ്പെടുത്തിയത്.

തിരഞ്ഞെടുപ്പ് ഫലം വന്നതിന് പിന്നാലെ നടി ശ്വേതാ മേനോൻ എല്ലാവർക്കും നന്ദി അറിയിച്ചു. 'അമ്മ' ഒരു സ്ത്രീയായി എന്നാണ് വിജയത്തിൽ നടിയുടെ പ്രതികരണം. സംഘടനയിൽനിന്ന് പിണങ്ങിപ്പോയവരെല്ലാം തിരികെ വരണം എന്നും ആവശ്യം വന്നാൽ അവരെ നേരിട്ട് വിളിക്കുമെന്നും ശേതാ മേനോൻ പ്രതികരിച്ചു.

തിരഞ്ഞെടുപ്പ് ഫലം:

പ്രസിഡന്റ്: ശ്വേതാ മേനോൻ (159 വോട്ട്). എതിർ സ്ഥാനാർഥി ദേവന് 132 വോട്ടാണ് ലഭിച്ചത്.
ജനറൽ സെക്രട്ടറി: കുക്കു പരമേശ്വരൻ (172 വോട്ട്). രവീന്ദ്രനാണ് പരാജയപ്പെട്ടത്.
വൈസ് പ്രസിഡന്റുമാർ: ലക്ഷ്മിപ്രിയ (139 വോട്ട്), ജയൻ ചേർത്തല (267 വോട്ട്).
ജോയിന്റ് സെക്രട്ടറി: അൻസിബ.
ട്രഷറർ: ഉണ്ണി ശിവപാൽ.