പ്രേക്ഷകർ ഏറെ ആകാംക്ഷയോടെ കാത്തുനിൽക്കുന്ന മോഹൻലാൽ ചിത്രമായ 'L366'-ൽ നിന്നുള്ള പുതിയ വിവരങ്ങൾ പുറത്തു വന്നു. 'തുടരും' എന്ന സൂപ്പർഹിറ്റ് സിനിമയ്ക്ക് ശേഷം തരുൺ മൂർത്തിയും മോഹൻലാലും വീണ്ടും ഒന്നിക്കുന്ന ഈ ചിത്രത്തിൽ മോഹൻലാൽ പോലീസ് വേഷത്തിലാണ് എത്തുന്നത്. ടി. എസ്. ലവ്ലജൻ എന്നാണ് ചിത്രത്തിലെ കഥാപാത്രത്തിന്റെ പേര്. കഴിഞ്ഞ ദിവസം പുറത്തിറങ്ങിയ സിനിമയുടെ പോസ്റ്ററിൽ പോലീസ് യൂണിഫോമിലുള്ള താരത്തിന്റെ ലുക്ക് ആരാധകർക്കിടയിൽ വലിയ തരംഗമായി മാറിയിട്ടുണ്ട്. താടി വടിച്ച് മീശ പിരിച്ചുള്ള മോഹൻലാലിന്റെ പുതിയ ഗെറ്റപ്പ് ഇതിനോടകം തന്നെ സോഷ്യൽ മീഡിയയിൽ വൈറലാണ്.
ആഷിക് ഉസ്മാൻ പ്രൊഡക്ഷൻസിന്റെ ബാനറിൽ മോഹൻലാൽ നായകനാകുന്ന ആദ്യ ചിത്രമാണിത്. നേരത്തെ രതീഷ് രവിയുടെ തിരക്കഥയിൽ ഓസ്റ്റിൻ ഡാൻസ് തോമസ് സംവിധാനം ചെയ്യാനിരുന്ന 'L365' എന്ന പ്രോജക്റ്റിൽ മാറ്റങ്ങൾ വന്നതോടെയാണ് 'L366' എന്ന പേരിൽ തരുൺ മൂർത്തി ഈ ചിത്രം ഏറ്റെടുത്തത്. രതീഷ് രവി തന്നെയാണ് ഈ ചിത്രത്തിനും തിരക്കഥ ഒരുക്കുന്നത്. പഴയ സിനിമയുടെ മറ്റൊരു രൂപമാണോ അതോ തികച്ചും പുതിയ കഥയാണോ ഇതെന്ന കാര്യത്തിൽ ആരാധകർക്കിടയിൽ ചർച്ചകൾ നടക്കുന്നുണ്ട്.
പ്രശസ്ത ചായഗ്രാഹകൻ ഷാജി കുമാറാണ് ചിത്രത്തിനായി ക്യാമറ ചലിപ്പിക്കുന്നത്. ജേക്സ് ബിജോയ് സംഗീതവും വിവേക് ഹർഷൻ എഡിറ്റിംഗും നിർവ്വഹിക്കുന്നു. ഗോകുൽ ദാസ് (കലാസംവിധാനം), വിഷ്ണു ഗോവിന്ദ് (ശബ്ദമിശ്രണം), മഷർ ഹംസ (വസ്ത്രാലങ്കാരം) എന്നിവരാണ് മറ്റ് അണിയറ പ്രവർത്തകർ. മികച്ച സാങ്കേതിക പ്രവർത്തകരുടെ നിര തന്നെയുള്ള ഈ ചിത്രം മോഹൻലാലിന്റെ കരിയറിലെ വലിയൊരു തിരിച്ചുവരവാകുമെന്നാണ് കരുതപ്പെടുന്നത്.