കൊച്ചിയിൽ നിന്ന് കൊടൈക്കനാലിലെ ഗുണാ കേവിലേക്ക് നടത്തിയ സാഹസിക യാത്ര മലയാള സിനിമയ്ക്ക് സമ്മാനിച്ചത് ചരിത്ര വിജയമായിരുന്നു. ബോക്സ് ഓഫീസിൽ റെക്കോർഡുകൾ തകർത്തെറിഞ്ഞ 'മഞ്ഞുമ്മൽ ബോയ്സ്' 55-ാമത് സംസ്ഥാന ചലച്ചിത്ര അവാർഡുകളിലും തിളക്കമാർന്ന പ്രകടനം കാഴ്ചവച്ചു. ഏറ്റവും കൂടുതൽ പുരസ്‌കാരങ്ങൾ വാരിക്കൂട്ടിയാണ് ഈ സർവൈവൽ ത്രില്ലർ സംസ്ഥാന ചലച്ചിത്ര പുരസ്‌കാര ചരിത്രത്തിൽ ഇടം നേടിയത്.
യഥാർത്ഥ സംഭവത്തെ ആസ്പദമാക്കി ചിദംബരം സംവിധാനം ചെയ്ത 'മഞ്ഞുമ്മൽ ബോയ്സ്' മികച്ച സിനിമയായി തിരഞ്ഞെടുക്കപ്പെട്ടു. ചിത്രത്തിന്റെ സംവിധായകൻ ചിദംബരം എസ്. പൊതുവാൾ മികച്ച സംവിധായകനുള്ള പുരസ്‌കാരവും, മികച്ച തിരക്കഥാകൃത്തുള്ളപുരസ്‌കാരവും സ്വന്തമാക്കി. കൂടാതെ, ചിത്രത്തിലെ ഹൃദയസ്പർശിയായ പ്രകടനത്തിന് സൗബിൻ ഷാഹിർ മികച്ച സ്വഭാവ നടനുള്ള പുരസ്‌കാരം (സിദ്ധാർത്ഥ് ഭരതനുമായി പങ്കിട്ടെടുത്തു) നേടി.
കലാപരമായും സാങ്കേതികപരമായും മഞ്ഞുമ്മൽ ബോയ്സ് ഏറെ മികച്ചുനിന്നു. ചിത്രത്തിന്റെ അന്തരീക്ഷവും ഗുഹാപരിസരവും ഭംഗിയായി പകർത്തിയ ഷൈജു ഖാലിദ് മികച്ച ഛായാഗ്രാഹകനുള്ള പുരസ്‌കാരം നേടി. കൂടാതെ, ചിത്രത്തിന്റെ ടെക്നിക്കൽ ടീം പല വിഭാഗങ്ങളിലും അംഗീകരിക്കപ്പെട്ടു.
മികച്ച സംവിധായകൻ: ചിദംബരം എസ്. പൊതുവാൾ
മികച്ച ചിത്രം: മഞ്ഞുമ്മൽ ബോയ്സ്
മികച്ച സ്വഭാവ നടൻ: സൗബിൻ ഷാഹിർ
മികച്ച ഛായാഗ്രഹകൻ: ഷൈജു ഖാലിദ്
മികച്ച കലാസംവിധാനം: അജയൻ ചാലിശ്ശേരി
മികച്ച ഗാനരചയിതാവ്: വേടൻ (ഗാനം: 'കുതന്ത്രം')
മികച്ച സൗണ്ട് ഡിസൈനിങ്: ഷിജിൻ മെൽവിൻ ഹട്ടൺ, അഭിഷേക് നായർ
മികച്ച സൗണ്ട് മിക്സിങ്: ഫസൽ എ. ബക്കർ, ഷിജിൻ മെൽവിൻ ഹട്ടൺ
മികച്ച ലാബ്/കളറിസ്റ്റ്: ശ്രീക് വാരിയർ
യഥാർത്ഥ സൗഹൃദത്തിന്റെ കഥ, ഒട്ടും അതിഭാവുകത്വം ഇല്ലാതെ, ശക്തമായ സാങ്കേതികത്തികവോടെ പ്രേക്ഷകരിലേക്ക് എത്തിച്ചതാണ് 'മഞ്ഞുമ്മൽ ബോയ്‌സിന്' ഈ വലിയ അംഗീകാരങ്ങൾ നേടിക്കൊടുത്തത്. കേരളത്തിന് പുറത്തും ഇന്ത്യൻ സിനിമയിൽ തന്നെ വലിയ ചർച്ചാവിഷയമായ ഈ ചിത്രം സംസ്ഥാന അവാർഡ് വേദിയിലും തിളക്കമുള്ള വിജയഗാഥ എഴുതിച്ചേർത്തു.