തിരുവനന്തപുരം: സംസ്ഥാന ചലച്ചിത്ര അക്കാദമിയുടെ പുതിയ അധ്യക്ഷനായി ഓസ്‌കർ ജേതാവായ സൗണ്ട് ഡിസൈനറും സംവിധായകനുമായ റസൂൽ പൂക്കുട്ടിയെ നിയമിച്ചു. നടിയും താരസംഘടനയായ 'അമ്മ'യുടെ ജനറൽ സെക്രട്ടറിയുമായ കുക്കു പരമേശ്വരനെ വൈസ് ചെയർപേഴ്‌സണായും നിയമിച്ചിട്ടുണ്ട്. മുൻ ചെയർമാൻ സംവിധായകൻ രഞ്ജിത്ത് വിവാദങ്ങളെ തുടർന്ന് സ്ഥാനമൊഴിഞ്ഞ ഒഴിവിലേക്കാണ് റസൂൽ പൂക്കുട്ടിയെ നിയമിച്ചത്. രഞ്ജിത്ത് സ്ഥാനമൊഴിഞ്ഞ ശേഷം വൈസ് ചെയർമാനായിരുന്ന നടൻ പ്രേംകുമാറിനായിരുന്നു താൽക്കാലിക ചുമതല.

സി. അജോയ് ആണ് അക്കാദമിയുടെ പുതിയ സെക്രട്ടറി. റസൂൽ പൂക്കുട്ടിയെയും കുക്കു പരമേശ്വരനെയും കൂടാതെ, അമൽ നീരദ്, ശ്യാം പുഷ്‌കരൻ, നിഖില വിമൽ, സിതാര കൃഷ്ണകുമാർ, സന്തോഷ് കീഴാറ്റൂർ, സുധീർ കരമന തുടങ്ങി 26 അംഗങ്ങളെയാണ് പുതിയ ഭരണസമിതിയിലേക്ക് തിരഞ്ഞെടുത്തിരിക്കുന്നത്. പുതിയ ഭരണസമിതിയുടെ കാലാവധി മൂന്ന് വർഷമായിരിക്കും. സംസ്ഥാന ചലച്ചിത്ര അവാർഡ് പ്രഖ്യാപനം ഉടൻ നടക്കാനിരിക്കെയാണ് അക്കാദമിയുടെ ഭരണസമിതിയിൽ നിർണായകമായ ഈ പുനഃസംഘടന.