റത്തീന സംവിധാനം ചെയ്യുന്ന പാതിരാത്രിയിലെ ആദ്യഗാനം പുറത്തിറങ്ങി. നവ്യ നായരും സൗബിൻ ഷാഹീറും കേന്ദ്ര കഥാപാത്രങ്ങളായെത്തുന്ന ഈ സിനിമയിൽ സംഗീതം ഒരുക്കിയിരിക്കുന്നത് ജേക്സ് ബിജോയ് ആണ്. ‘തുടരും’, ‘ലോക’ എന്നീ വിജയചിത്രങ്ങൾക്ക് ശേഷം സംഗീതജ്ഞൻ ഒരുക്കുന്ന ഈ ഗാനരചനയാണ് ആരാധകരിൽ ആവേശം സൃഷ്ടിച്ചത്.ചിന്മയി ശ്രീപദയുടെ ശബ്ദത്തിൽ ആലപിച്ച ‘നിലഗമനം…’ എന്ന പ്രോമോ സോങ്ങാണ് അണിയറപ്രവർത്തകർ പുറത്തുവിട്ടത്. സിനിമയുടെ ഭാവനയോടും ജാനറിനോടും ചേർന്ന നിലയിലാണ് ഈ ഗാനം ഒരുക്കിയിരിക്കുന്നത്.
ബെൻസി പ്രൊഡക്ഷൻസ് ബാനറിൽ ഡോ. കെ.വി. അബ്ദുൾ നാസറും ആഷിയ നാസറും ചേർന്ന് ചിത്രം നിർമ്മിക്കുന്നു. ടി-സീരീസ് മലയാളം യൂട്യൂബ് ചാനലിലൂടെയാണ് ഗാനം പുറത്തുവന്നത്.സിനിമയുടെ ട്രെയിലർ ഇതിനകം സോഷ്യൽ മീഡിയയിൽ മികച്ച പ്രതികരണം നേടിയിട്ടുണ്ട്. യൂട്യൂബിൽ നാല്പത് ലക്ഷത്തിലധികം പ്രേക്ഷകർ ഇതിനകം കണ്ടു കഴിഞ്ഞു. ഒരു കൊലപാതക അന്വേഷണത്തിന്റെ പശ്ചാത്തലത്തിൽ നീങ്ങുന്ന ഇൻവെസ്റ്റിഗേഷൻ ത്രില്ലറായിരിക്കും ‘പാതിരാത്രി’, എന്നതാണ് ട്രെയിലർ സൂചന നൽകുന്നത്. നവ്യ നായർ ആദ്യമായി പോലീസ് വേഷത്തിലെത്തുന്നതുമാണ് ചിത്രത്തിന്റെ പ്രധാന ആകർഷണങ്ങളിൽ ഒന്ന്.
സൗബിൻ ഷാഹിറിനൊപ്പം സണ്ണി വെയ്ൻ, ആൻ അഗസ്റ്റിൻ, ഇന്ദ്രൻസ്, അച്യുത് കുമാർ, ഹരിശ്രീ അശോകൻ, ശബരീഷ് വർമ്മ, ആത്മീയ രാജൻ എന്നിവരും പ്രധാന കഥാപാത്രങ്ങളായി എത്തുന്നു.ചിത്രത്തിന്റെ ഛായാഗ്രഹണം ഷെഹ്നാദ് ജലാലിന്റേയും എഡിറ്റിംഗ് ശ്രീജിത്ത് സാരംഗിന്റേയുംതാണ്. ആർട്ട് ദിലീപ് നാഥ് നിർവഹിക്കുന്നു. പ്രൊഡക്ഷൻ കൺട്രോളർ പ്രശാന്ത് നാരായണൻ, വസ്ത്രാലങ്കാരം ലിജി പ്രേമൻ, മേക്കപ്പ് ഷാജി പുൽപ്പള്ളി എന്നിവരാണ്. ടി-സീരീസ് വലിയ തുകയ്ക്ക് സംഗീതാവകാശം സ്വന്തമാക്കിയതായി റിപ്പോർട്ടുകൾ വ്യക്തമാക്കുന്നു.