ഒ.ജെ ജനീഷിനെ യൂത്ത് കോൺഗ്രസ് സംസ്ഥാന അധ്യക്ഷനായി തിരഞ്ഞെടുത്തു. ബിനു ചുള്ളിയിലിനെ വർക്കിങ് പ്രസിഡാന്റായും നിയമിച്ചു.ലൈംഗിക ആരോപണങ്ങളെത്തുടർന്ന് രാഹുൽ മാങ്കൂട്ടത്തിൽ രാജിവെച്ചതിനെ തുടർന്നാണ് യൂത്ത് കോൺഗ്രസിന് സംസ്ഥാന അധ്യക്ഷനില്ലാത്ത സാഹചര്യം വന്നത്. സംസ്ഥാന ഉപാധ്യക്ഷനായ അബിൻ വർക്കിയുടെ പേര് സജീവമായി പരിഗണിച്ചിരുന്നെങ്കിലും ഒടുവിൽ ഒ.ജെ. ജനീഷിനെ അധ്യക്ഷനായി നിയമിച്ചു.

ഷാഫി പറമ്പിൽ മുന്നോട്ടുവെച്ച പേരായിരുന്നു ഒ.ജെ. ജനീഷിന്റേത്. യൂത്ത് കോൺഗ്രസിലെ നിലവിലെ സംസ്ഥാന ഭാരവാഹികളിൽ നിന്ന് തന്നെ അധ്യക്ഷ പദവിയിലേക്ക് എത്തണമെന്ന അഭിപ്രായം ഉയർന്നിരുന്നു. കെ.എസ്.യു. യൂണിറ്റ് പ്രസിഡന്റായി രാഷ്ട്രീയ പ്രവർത്തനം തുടങ്ങിയ ഒ.ജെ. ജനീഷ്, പിന്നീട് തൃശ്ശൂർ ജില്ലാ പ്രസിഡന്റായി പ്രവർത്തിച്ചു. യൂത്ത് കോൺഗ്രസിന്റെ ജില്ലാ പ്രസിഡന്റായും അദ്ദേഹം പ്രവർത്തിച്ചിട്ടുണ്ട്.